BQO-da sońǵy tórt kúnde koronavırýs juqtyrǵandar sany 500-ge jýyqtady
ORAL. QazAqparat – Batys Qazaqstan oblysynda sońǵy tórt kúnde 485 adam koronavırýs juqtyrdy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti málim etkenindeı, sonyń ishinde 340 adamda aýrý belgileri bolsa, qalǵan 145-inde sımptomsyz ótýde.
Aýyrǵandardyń 275-i JRVI belgileri boıynsha qaralǵanda, 161-i indet oshaǵyn teksergende, 45-inen profılaktıkalyq maqsatta, tórteýinen statsıonarǵa jatqyzar aldynda synama alynǵanda anyqtaldy.
Sońǵy tórt táýlikte syrqattanǵandardyń 266-sy Oral qalasynyń úlesine tıedi. Sondaı-aq Báıterek aýdanynda 83, Shyńǵyrlaýda 25, Bórlide 24, Qaztalovta 22 adamnan indet tabyldy.
Oblysta indet bastalǵannan beri 16385 adam koronavırýs juqtyrsa, sonyń 13108-i jazylyp shyqty. 257 adam kóz jumdy. Sonyń ishinde aýyrǵandardyń 9439-y Oralda, 1742-si Bórli, 1701-i Báıterek aýdandarynda tirkelgen.
Eske sala keteıik, budan buryn BQO-daǵy aýylda karantın kúsheıtilip, sanpostar qoıylatynyn jazǵan bolatynbyz.
