BQO-da sońǵy tórt kúnde 364 adam koronavırýs juqtyrǵan
ORAL. QazAqparat – Batys Qazaqstan oblysynda sońǵy tórt kúnde 364 adam koronavırýs juqtyrǵan, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti málim etkenindeı, sonyń 216-synda aýrý belgileri bolsa, 148-i – sımptomy joqtar.
Oblysta tórt kúnde tirkelgenderdiń 233-i nemese basym kópshiligi Oral qalasynyń úlesine tıedi. Sondaı-aq Bórli aýdanynda 38, Báıterekte 32, Tasqalada 15, Shyńǵyrlaýda 10, Terekti men Qaztalovta 9 adam indetke shaldyqqan.
Osy kezge deıin oblysta 15146 adam aýyrsa, sonyń 12241-i jazylyp shyqty. Kóz jumǵandar sany 241-ge jetti.
Barlyq syrqattanǵandardyń 8795-i Oralda, 1590-y Bórli aýdanynda, 1524-i Báıterekte, 602-si Terektide, 554-i Aqjaıyqta tirkelgen.
Epıdemıolog mamandardyń sózine qaraǵanda, adamdar koronavırýsty negizinen saýda úıleri men bazarlarda, qoǵamdyq kólikter men emhanalarda, jumys oryndarynda juqtyrýda. Oǵan qosa sadaqa, toı-tomalaqtyń tyıylmaı otyrǵany da derttiń órshı túsýine sebep bolýda.
BQO bas memlekettik sanıtar dárigeriniń 30 naýryzdaǵy qaýlysy 1 sáýirden bastap kúshine endi. Osyǵan sáıkes turǵyndardyń sanıtarlyq talaptardy saqtaýyn qadaǵalaıtyn monıtorıngtik toptardyń jumysy da kúsheıtiletin bolady.
Eske sala keteıik, budan buryn Batys Qazaqstanda 434 baladan koronavırýs tabylǵanyn, 82 myńnan astam oqýshynyń qashyqtan bilim alyp jatqanyn jazǵan bolatynbyz.
