BQO-da sońǵy tirkelgen naýqastyń aýrýdy qaıdan juqtyrǵany anyqtaldy
ORAL. QazAqparat – Batys Qazaqstan oblysynda sońǵy tirkelgen naýqastyń aýrýdy qaıdan juqtyrǵany anyqtaldy, dep habarlaıdy QazAqparat tilshisi.
BQO shuǵyl shtaby málim etkenindeı, naýqas 53 jasta, Oral qalasynyń turǵyny.
Áıel karantındik statsıonarda medbıke bolyp jumys isteıdi. Ol aýrýdy budan buryn koronavırýs anyqtalǵan medıtsına qyzmetkerinen juqtyrǵan.
Qazirgi ýaqytta naýqas oblystyq juqpaly aýrýlar aýrýhanasynda em qabyldaýda.
Aýrý oshaqtarynda dezınfektsııalyq jumystar júrgizildi. Naýqas turǵan úıdiń kireberisine karantın qoıyldy.
Epıdemııaǵa qarsy is-sharalar jalǵasýda.
Osylaısha 14 sáýir kúngi málimet boıynsha BQO-da aýyrǵandar sany 12-ge jetti.
BQO taýarlar men kórsetiletin qyzmetter sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, 13 jáne 14 sáýir kúnderi úsh naýqas tirkelse, sonyń ekeýi onyń aldynda aýyrǵan medıtsına qyzmetkerimen qarym-qatynasta bolǵan.
Bulardyń úsheýimen jaqyn baılanysta bolǵandar oqshaýlanyp, tekserilip, synamalar alyndy. Olardan koronavırýs anyqtalǵan joq.
Sonymen qatar N.Mustaev áleýmettik jelilerde jalǵan aqparat tarap jatqandyǵyn jetkizdi.
«Áleýmettik jelilerde BQO-da koronavırýspen aýyrǵandar turǵan mekenjaılar kórsetilgen aqparat tarady. Bul – jalǵan. Sol sekildi bir aýdıojazbada naýqastyń karantındik statsıonarda jatqany aıtylady. Bul da shyndyqqa sáıkes kelmeıdi. Koronavırýs anyqtalǵan jaǵdaıda emdelýshi birden oblystyq juqpaly aýrýlar aýrýhanasyna jetkiziledi. Sondyqtan turǵyndardyń tek resmı málimetterge senýin ótinemiz», dedi N.Mustaev.
Eske sala keteıik, budan buryn Oralda medıtsına qyzmetkeriniń koronavırýs juqtyrǵanyn, óńirde sońǵy tirkelgen eki naýqastyń biri Reseıden kelgenin jazǵan bolatynbyz.
Sondaı-aq batysqazaqstandyq dáriger basty mindet kásibı ári jaýapkershilikpen jumys isteý ekendigin aıtty.
Ústemeaqy medıtsına qyzmetkerlerin jigerlendire tústi.
