BQO-da sońǵy on kúnde koronavırýs juqtyrǵandar 70 paıyzǵa ósti – ákim úndeý jasady
ORAL. QazAqparat – Karantın talaptaryn saqtamaıynsha, shekteý sharalaryn jeńildetý múmkin emes. Bul týraly oblys ákimi Ǵalı Esqalıev óńir turǵyndaryna arnaǵan úndeýinde málim etti, dep habarlaıdy QazAqparat tilshisi.
Ákimniń málim etkenindeı, tótenshe jaǵdaı kezinde oblysta koronavırýstyń aldyn alý jáne ony taratpaý boıynsha aýqymdy jumystar júrgizildi.
Aımaqta karantın rejımi saqtalǵanymen, keıbir azamattar óz qaýipsizdiginiń qarapaıym talaptaryn saqtamaı júr. Sonyń saldarynan 11-25 mamyr aralyǵynda oblysta COVID-19 aýrýyn juqtyrý 70%-ǵa ósti. 26 mamyrda oblys boıynsha juqtyrǵandar sany 467-ge jetti.
Eger buryn aýrýdyń ósimi Reseı Federatsııasy men Atyraý oblysynan kelgen adamdar esebinen bolǵan bolsa, búginde indettiń oblys ishinde ósimi baıqalady.
Sonymen qatar Oral qalasy men aýdandarda karantındik rejım talaptary saqtalmaı otyr. Birinshi kezekte turǵyndar maska kııý, áleýmettik qashyqtyqty saqtaý sııaqty qarapaıym talaptardy oryndamaı júr.
Bir-birine qonaqqa barý sııaqty quqyqbuzýshylyq faktileri de bar. Sonyń kesirinen oblystyń segiz birdeı aýdanynda 37 aýrý oshaǵy paıda boldy.
Búgingi tańda aımaqta aýrý juqtyrǵan adamdardy anyqtaý úshin jappaı arnaıy testileý ótkizilýde. Kúnine ortasha eseppen 600-700 adam test tapsyrýda. Olardyń arasynda ınfektsııany juqtyrǵandar da kezdesedi.
Bul - ınfektsııanyń oblys aýmaǵynda keń aýqymda taraǵanynyń belgisi. Kóbinde adamdarda koronavırýs juqpasy aıqyn aýrý belgilerisiz ótýde.
Aýrýdyń aıqyn belgileri bolmaýynyń qaýiptiligi - juqtyrǵan adam - ınfektsııa kózi bolyp tabylady. Infektsııa juqtyrǵan adam aýrý týraly bilmeı, basqalarǵa juqtyrýy múmkin. Buryn tek jasy úlken adamdar ǵana ınfektsııa juqtyrý qaýpi joǵary degen qate túsinik qalyptasqan edi. Bul teris pikir. Búginde atalǵan aýrý jas tańdamaıtynyna kóz jetip otyr.
Búgingi tańda oblysta tirkelgen 467 naýqastyń 21-i on tórt jasqa deıingi balalar bolsa, al qalǵan basym bóligi - 50 jasqa deıingi azamattar. Sondyqtan jasy men densaýlyǵyna qaramastan bul aýrýdan tónetin qaýip barlyǵyna birdeı.
Keıbir azamattar koronavırýs bar ekenine senbeı júr. Bul múldem durys emes. Vırýstyń qaýiptiligi - onyń keıbir adam aǵzasyna óte tez áser etýinde. Mysaly, Teńiz keń ornynda qyzmet etken azamat 2 kúnniń ishinde reanımatsııaǵa tústi. Dárigerler eńbeginiń arqasynda ol ólim aýyzynan qutqaryldy.
Sondyqtan koronavırýstyq ınfektsııanyń belgileri anyqtalsa, tez arada jedel járdemge habarlasý qajet. Ózdiginen emdelýge bolmaıdy.
«Vırýstyń kóbeıýine baılanysty biz kóptegen bıznes nysandardy, balabaqshalardy, basqa da oıyn-saýyq oryndaryn asha almaı otyrmyz. Sonyń saldarynan myńdaǵan otbasy nesıelerin tóleı almaı, taýarlaryn sata almaı, shyǵynǵa batyp otyr. Biz olarǵa tezirek jumysqa oralýyna, eńbek etýine jáne otbasylaryn asyraýǵa múmkindik berýimiz kerek.
Karantın rejımin jeńildetý týraly sheshim qabyldaý úshin bir ǵana nárse qajet - qaýipsizdik talaptaryn saqtaý. Bul qıyn emes. Basty maqsat - kóp adam shoǵyrlanǵan jerlerge barmaı, talaptardy qatań saqtaý. Maskalar men antıseptıkter satylymda jetkilikti.
Osy jaǵdaılardy eskere otyryp, oblys ákimi jáne jedel shtab basshysy retinde, aımaqta karantın talaptary tıisti túrde saqtalmasa, rejımdi qatańdatýǵa májbúr bolatynymyzdy aıtqym keledi. Bizdiń ortaq maqsatymyz - ınfektsııadan birjolata tolyqtaı qutylý.
Sondyqtan taǵy da barlyq oblys turǵyndaryn sanıtarlyq talaptardy saqtaýǵa shaqyramyn», dedi óńir basshysy.
Eske sala keteıik, budan buryn BQO-da adamdardyń bir-birine koronavırýs juqtyrýy jıilep otyrǵanyn jazǵan bolatynbyz.
