BQO-da sońǵy kúnderi birneshe adam sýǵa ketti
BQO TJ departamenti jedel qutqarý jasaǵy basshysynyń orynbasary Nursultan Amangeldiulynyń aıtýynsha, 17 maýsym kúni Aqjaıyq aýdany Almaly aýylynda saǵat 10.53-te 1986 jylǵy Qanat esimdi turǵynnyń Jaıyq ózenine batyp ketkeni jóninde habar tústi. Onyń denesi áli tabylǵan joq. Sol kúni saǵat 15.40-ta Oral qalasyndaǵy «Shale» kafesiniń aýmaǵynda 1978 jylǵy Saǵynǵalı esimdi azamat Jaıyqtan shyqpaı qaldy. Marqumnyń denesi saǵat 18.00-de sýdan shyǵaryldy.
18 maýsym kúni Zelenov aýdany Kırsanov aýylynda saǵat 22.00-de 1977 jylǵy Aleksandr esimdi Oral qalasynyń turǵyny Jaıyqqa batyp ketti. Sol mańǵa balyq aýlaýǵa baryp, «tilsiz jaýdyń» qurbany bolǵan onyń denesi 20 maýsym kúni tańerteń shyǵaryldy.
19 maýsym kúni saǵat 17.51-de taǵy da «Shale» kafesi mańynda 1971 jylǵy Ismaǵul esimdi azamattyń sýǵa ketkeni jóninde habar tústi. Onyń denesi áli tabylǵan joq.
Oǵan qosa osy kezeńde tórt adam sýdan qutqaryldy. Atap aıtqanda, 17 maýsym kúni saǵat 15.58-de qalalyq mádenıet jáne demalys saıabaǵy mańynda epılepsııamen aýyratyn 2000 jylǵy Marına men 1997 jylǵy Syrym qutqarýshylardyń arqasynda aman qaldy. Sol sekildi 18 maýsym kúni saǵat 17.10-da 1992 jylǵy A.Kýznetsova men 1981 jylǵy A.Shýlman qutqarylyp, olarǵa alǵashqy járdem kórsetildi.
Aıta keteıik, bıyl osymen 8 adam sýǵa ketse, sonyń bireýi bala bolyp otyr. Bul málimetke áli tabylmaǵan eki adam qosylǵan joq.