BQO-da sońǵy bes jylda aýyl sharýashylyǵy salasyna 67 mlrd teńge bólindi
ORAL. QazAqparat - Batys Qazaqstan oblysynda sońǵy bes jylda aýyl sharýashylyǵy salasyna 67 mlrd teńge bólindi, dep habarlaıdy «QazAqparat» tilshisi.
Oblystyq qazaq drama teatrynda aýyl sharýashylyǵy qyzmetkerleriniń kúnine arnalǵan saltanatty jıynda oblys ákiminiń birinshi orynbasary Arman Óteǵulovtyń málim etkenindeı, bıyldyń ózinde 10,4 mlrd teńge qaraldy. Bul 2016 jylǵydan 12 paıyzǵa kóp. Elbasy tapsyrmasyna sáıkes memleket tarapynan agroónerkásip salasyn turaqty qoldaýdyń nátıjesinde mal basy ósip, eginnen de jaqsy ónim alynýda. Oblysta 6087 sharýashylyq qurylymy bolsa, saladaǵy jalpy ónim kólemi ótken ǵasyrdyń toqsanynshy jyldarymen salystyrǵanda, 18 esege (7 mlrd teńgeden 131 mlrd teńgege) artty. 2000 jylmen salystyrǵanda, iri qara 1,7, qoı-eshki 2,3, jylqy 2,9, qus 2,8 esege ósti.
Oblystyq aýyl sharýashylyǵy basqarmasynyń basshysy Berik Esenǵalıevtiń aıtýynsha, Aq Jaıyq óńiri qazaqtyń aqbas sıyrynyń, edilbaı qoıynyń, kóshim jylqysynyń, baktrıan túıesiniń otany bolyp tabylady. Sol sebepti oblysta mal sharýashylyǵyna basymdyq berilip otyr. Mal sharýashylyǵy óńirdiń barlyq aýdanynda qarqyndy damýda. Ásirese, Aqjaıyq, Bókeı ordasy, Jańaqala, Jánibek, Qaztalov jáne Qaratóbede etti baǵyttaǵy mal ósirilse, oblys ortalyǵyna jaqyn ornalasqan aýdandar sútti baǵyttaǵy mal ósirýge den qoıyp, sút ónimderin óńdeý boıynsha júıeli jumystanýda. Al Bórli, Zelenov, Syrym, Tasqala, Terekti, Shyńǵyrlaý aýdandaryndaǵy agroqurylymdar ósimdik sharýashylyǵyn damytýǵa óz úlesterin qosyp keledi.
Memleket basshysy aýyl sharýashylyǵy ónimderiniń sapasy joǵary, ekologııalyq turǵydan taza bolýy kerektigin atap kórsetkeni belgili. Óıtkeni mundaı azyq-túlik taýarlaryna shetelderden suranys joǵary. Solardyń biri - dándi daqyldar. Óńirdegi barlyq aýyl sharýashylyǵy daqyldarynyń bıylǵy naqty sebý alańy 487,3 myń gektar boldy. Bıyl batysqazaqstandyq dıqandar dándi daqyldardyń ár gektarynan 14,7 tsentnerden ónim jınady. Bul - Qazaqstan táýelsizdik alǵaly beri oblys qol jetkizgen eń joǵary kórsetkish. Jalpy, oblys boıynsha 360 myń tonna astyq bastyryldy. 2014 jylǵy deńgeımen salystyrǵanda ol 151,6 paıyzǵa joǵary.
Aýyl sharýashylyǵyn ilgeriletý jolyndaǵy túrli jumystar aldaǵy ýaqytta da jalǵaspaqshy.
Saltanatty jıyn barysynda sala úzdikteri QR Aýyl sharýashylyǵy mınıstrliginiń «Eńbek ardageri» medalimen, «Aýyl sharýashylyǵy salasynyń úzdigi» tósbelgisimen, qurmet gramotalarymen jáne túrli atalymdar boıynsha oblys ákiminiń alǵyshattarymen marapattaldy.
