BQO-da sońǵy aptada koronavırýs juqtyrý kórsetkishi 72 paıyzǵa ósti
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, aldyńǵy aptada 8 adamnan vırýs tabylsa, 7-13 shilde aralyǵynda 29 naýqas tirkeldi.
Shilde aıynda 37 adam syrqattansa, sonyń 25-i nemese 67 paıyzy Oral qalasynyń úlesine tıedi. Sondaı-aq Bórli aýdanynda 4 (11 paıyz), Báıterekte 4 (11 paıyz), Jańaqalada 2 (5 paıyz), Tasqala men Kaztalovta 1 naýqastan tirkeldi.
Jalpy, jyl basynan beri 9 627 adamnan koronavırýs anyqtaldy.
«Oblysta vaktsınatsııa bastalǵannan beri egilýge tıisti 414 390 turǵynnyń 67 paıyzy (277 702) birinshi, 65 paıyzy (269 531) ekinshi komponentti qabyldady. Sondaı-aq revaktsınatsııaǵa jatatyn 200 308 turǵynnyń 100 884-i nemese 50,4 paıyzy egildi. Oǵan qosa 5 317 adam qaıta revaktsınatsııalaýdan ótti. Sonymen qatar jasóspirimder, júkti jáne bala emizetin áıelderdi egý jumystary jalǵasýda. Іndettiń qaıta bas kóterýine baılanysty ýaqtyly ekpe alýdyń mańyzy zor. Óńirde vaktsına qory jetkilikti», dedi N.Mustaev.
Eske sala keteıik, budan buryn Batys Qazaqstanmen kórshiles Reseı oblystarynda koronavırýstyń órship turǵanyn jazǵan bolatynbyz.
