BQO-da sońǵy aptada koronavırýs juqtyrý kórsetkishi 44 paıyzǵa ósti
ORAL. QazAqparat – Batys Qazaqstan oblysynda sońǵy aptada koronavırýs juqtyrý deńgeıi 44,2 paıyzǵa ósti, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda málim etkenindeı, aldyńǵy aptada (15-21 qańtar) óńirde 353 adam koronavırýs juqtyrǵan bolatyn.
Sońǵy aptada (22-28 qańtar) bul kórsetkish 633-ke jetti. Keshe 104 adamnyń aýyrǵany anyqtaldy.
Jyl basynan beri oblysta 1561 adamnyń koronavırýs juqtyrǵany tirkeldi.
Ásirese, aýyrǵandar sany Oralda (717), Báıterek (324) jáne Bórli (209) aýdandarynda kóbeıe túsýde.
Syrqattanǵandarmen baılanysta bolǵan 2040 adam zerttelip, medıtsınalyq baqylaýǵa alyndy.
M.Aryspaevtyń sózine qaraǵanda, aýyrǵandardyń 707-si nemese 45 paıyzy – jumys isteıtin adamdar, 290-y nemese 18 paıyzy – zeınetkerler.
«Sondaı-aq 114 oqýshy, 72 muǵalim, 51 medıtsına qyzmetkeri indetke shaldyqty. Koronavırýs juqtyrǵan medıtsına qyzmetkerleriniń kópshiligi olardyń kásibı qyzmetine baılanysty emes. Oblysta 11 qańtarda bastalǵan úshinshi toqsannan beri 91 oqýshydan indet tabyldy. Qalalyq, aýdandyq bas memlekettik sanıtar dárigerleriniń qaýlysyna sáıkes oblys boıynsha barlyǵy 34 synyp karantınge jabyldy», dedi M.Aryspaev.
Onyń aıtýynsha, Reseıden kelgender arasynan koronavırýstyń tabylýy jalǵasýda. Aıtalyq, qańtar aıynda memlekettik shekaradan 20718 adam ótse, sonyń 4819-y – jolaýshylar. Anyqtamasy joq 597 jolaýshynyń úsheýinen kovıd anyqtaldy. Halyqaralyq júk tasymalymen aınalysatyn 10474 júrgizýshiniń 4247-sinde anyqtama joq bolyp shyqty. Bulardyń beseýi indet juqtyrǵan.
Eske sala keteıik, budan buryn Oralda jeksenbi kúnderi qoǵamdyq kóliktiń júrmeıtinin jazǵan bolatynbyz.
