BQO-da sońǵy úsh jylda elýden astam medıtsınalyq nysan boı kóterdi

ORAL. KAZINFORM — Batys Qazaqstan oblysynda 2023 jyldan bergi merzimde 52 jańa medıtsınalyq nysan paıdalanýǵa berildi.

BQO ákimdiginen málim etkenindeı, «Aýyldaǵy densaýlyq saqtaý salasyn jańǵyrtý» ulttyq jobasy aıasynda 50 medıtsınalyq nysan salynyp, Prezıdent tapsyrmasy tolyq oryndaldy.

Qazirgi tańda Kaztalov jáne Bórli aýdandarynda aýdanaralyq aýrýhanalar qurylysy júrgizilip jatyr. Bul óńirdegi medıtsınalyq qyzmet kórsetýdiń qoljetimdiligin arttyrýǵa baǵyttalǵan mańyzdy qadam bolyp otyr.

Ákimdik málimetine qaraǵanda, sońǵy úsh jyl ishinde densaýlyq saqtaý salasyna 442 dáriger tartyldy, olardyń 236-sy aýyldyq jerlerge jiberildi. Bul aýyldaǵy medıtsınalyq kadr tapshylyǵyn azaıtýǵa jáne halyqqa sapaly medıtsınalyq kómek kórsetýdi qamtamasyz etýge múmkindik berdi.

- Salanyń materıaldyq-tehnıkalyq bazasyn jaqsartý úshin 10,1 mlrd teńge bólinip, shamamen 1 094 zamanaýı medıtsınalyq qural-jabdyq satyp alyndy. Nátıjesinde, oblystyń medıtsınalyq jabdyqtalý deńgeıi 83,8 paıyzǵa jetti. Jalpy alǵanda, densaýlyq saqtaý salasyndaǵy júrgizilip jatqan keshendi sharalar halyqqa sapaly medıtsınalyq qyzmet kórsetý men aýyldyq jerlerde medıtsınalyq ınfraqurylymdy nyǵaıtýǵa baǵyttalǵan, - dep habarlady vedomstvodan.

Eske sala keteıik, budan buryn Oralda jańa emhana salý qajettigi týyndaǵanyn jazǵan edik.