BQO-da sońǵy on kúnde jol apattarynan tórt adam mert boldy
ORAL. KAZINFORM — Batys Qazaqstan oblysynda 11-19 shilde aralyǵynda «Qaýipsiz jol» jedel aldyn alý is-sharasy aıasynda 2 757 ákimshilik quqyq buzýshylyqtyń joly kesildi.
BQO polıtsııa departamentiniń baspasóz qyzmetinen málim etkenindeı, sonyń ishinde 29 adam kólik quralyn mas kúıinde aıdaǵan. 116-synyń júrgizýshilik quqyǵy bolmaǵan. 35-i kólik quralyn basqarý quqyǵynan aıyrylǵan.
Sondaı-aq 365-i avtokólik aıdap kele jatyp, telefondy paıdalanǵan. 34-i qarsy qozǵalys jolaǵyna shyǵyp ketse, 41-i jolaýshylardy zańsyz tasymaldaǵan. 471-i kólik quraldarynyń tehnıkalyq jaı-kúıine qatysty talaptardy buzǵan. 12-si memlekettik tirkeý nómirin jasyrǵan nemese qoldan jasaǵan.
Sonymen qatar 231 kólik arnaıy aıyp turaǵyna qoıyldy.
«Qaýipsiz jol» is-sharasy kezinde apat jıi bolatyn jol ýchaskelerinde ýaqytsha 4 baqylaý beketi uıymdastyrylyp, júrgizýshilermen túsindirý jumystary júrgizildi. 2 myńnan astam jadynama taratyldy.
Jol qaýipsizdigin arttyrý maqsatynda 729 jol belgisi, 2 baǵdarsham ornatylyp, 20 jaıaý júrginshiler ótkeli jaryqtandyryldy, 10 jerde jasandy jol kedergileri qoıyldy. Sondaı-aq 5 shaqyrym kóshe jaryǵy ornatylyp, respýblıkalyq mańyzy bar joldardyń 2 ýchaskesinde jaryq lazerleri kesheni iske qosyldy.
Qabyldanǵan sharalarǵa qaramastan, atalǵan kezeńde 6 jol-kólik oqıǵasy tirkeldi. Apattardyń saldarynan 4 adam qaza taýyp, 9-y túrli dene jaraqatyn aldy. Olardyń ishinde kámeletke tolmaǵandardyń qatysýymen 1 jol-kólik oqıǵasy bolyp, 2 jasóspirim jaraqattandy.
- Jol-kólik oqıǵalaryna ushyraǵan kólik quraldarynyń basym bóligi Qazaqstan Respýblıkasynda tirkelgen. Oń rýldi avtokólikter qatyspaǵan. Tek bir jaǵdaıda Reseı Federatsııasynyń azamaty óz kóligimen jol apatyna urynǵan. Barlyq júrgizýshilerdiń mas kúıinde bolmaǵany anyqtaldy. Bir jol apatynda kólik quralyn basqarý quqyǵynan aıyrylǵan júrgizýshi avtokólik aıdaǵan, - dep habarlady vedomstvodan.
Departament málimetine qaraǵanda, respýblıkalyq mańyzy bar avtojoldarda ushqyshsyz ushý apparattary josparly túrde qoldanylyp keledi. Jyl basynan beri drondardyń kómegimen jol qozǵalysy erejesin buzýdyń 41 deregi tirkeldi.
«Qorǵaý» aqparattyq júıesiniń kómegimen bıyl 3 213 júrgizýshiniń quqyq buzǵany belgili boldy. Sondaı-aq jol qozǵalysy erejesin úsh jáne odan da kóp ret buzǵan 83 qaýipti júrgizýshi esepke alyndy.
Eske sala keteıik, budan buryn Oralda kólik qaǵyp ketken 7 jastaǵy qyzdyń qaza tapqanyn jazǵan edik.
