BQO-da sońǵy 5 jylda otbasylyq-turmystyq qylmystar úsh esege ósken
ORAL. KAZINFORM — Batys Qazaqstan oblysynda sońǵy bes jylda qylmystyq quqyq buzýshylyqtar shamamen úsh esege (2019 jylǵy 9 437-den bıylǵy toǵyz aıdaǵy 3 405-ke deıin) azaıdy. Bul týraly zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi BQO úılestirý keńesiniń otyrysynda oblys prokýrorynyń birinshi orynbasary Dáýren Omarǵalıev málimdedi.
Onyń aıtýynsha, esesine kámeletke tolmaǵandarǵa qarsy jáne otbasylyq-turmystyq saladaǵy qylmystardy sany 3 esege ósken (2019 jyly — 81, 2020 jyly — 98, 2021 jyly — 136, 2022 jyly — 178, 2023 jyly — 159, bıylǵy toǵyz aıda — 234).
«Áıelder men balalarǵa qatysty zorlyq-zombylyq qoǵamda ózekti másele bolyp otyr. Ótken jyldyń osy kezeńimen salystyrǵanda, balalarǵa qatysty qylmys 28 paıyzǵa (96-dan 123-ke), otbasylyq-turmystyq salada 484 paıyzǵa (19-dan 111-ge) artty. Otbasylyq-turmystyq saladaǵy qylmystyń kúrt kóbeıýi uryp-soǵý men densaýlyqqa qasaqana jeńil zııan keltirýdiń osy jyldyń maýsym aıynan bastap ákimshilik emes, qylmystyq quqyq buzýshylyqqa aýysýyna baılanysty. Alaıda qylmystar úshin jaýapkershilik tek olardy jasaǵan adamdarǵa ǵana júktelmeıdi, munda qylmystyń aldyn alý úshin barlyq qajetti kúsh-jigerdi qoldanbaǵan nemese áreketsizdik tanytqan memlekettik organdar da kináli», — deıdi D. Omarǵalıev.
Balalardyń qaýipsizdigin qamtamasyz etý, otbasyndaǵy zorlyq-zombylyqpen qatar qoǵamdyq oryndarda jasalatyn qylmystyń (1 127-den 1 159-ǵa) 3 paıyzǵa artýy da alańdatady.
BQO prokýrorynyń birinshi orynbasary sonymen qatar ózine-ózi qol jumsaǵan balalardyń sany 2023 jyly 150 (2-den 5-ke), bıylǵy toǵyz aıda taǵy 80 paıyzǵa (5-ten 9-ǵa deıin) óskendigin jetkizdi. Al ózine-ózi qol jumsaý áreketteri 2023 jyly 50 paıyzǵa (8-den 12-ge) artsa, bıyl 41 paıyzǵa (12-den 7-ge) tómendegeni baıqalady.
«Bizdiń tapsyrmamyzben psıhologııalyq qoldaý ortalyǵy ózine-ózi qol jumsaýdyń sebepterine taldaý jasady. Munyń nátıjesi kóp jaǵdaıda balalardy mundaı áreketke ıtermeleıtin faktorlar retinde ata-ana nazarynyń jetispeýi jáne olarmen ózara túsinistiktiń bolmaýy ekendigin kórsetti. Óıtkeni balalar ózine-ózi qol jumsaǵanǵa deıin hat-habardy ata-analaryna emes, aǵa-apalaryna qaldyrǵan. Bir jaǵdaıda 14 jasar qyz anasynyń qoldaýyn kútkenin tikeleı kórsetken. 19 derektiń beseýinde jasóspirimder ózine-ózi qol jumsaýǵa oqtalýynyń sebepterin otbasyndaǵy janjalmen baılanystyrǵan. Qalǵan 14 jaǵdaıda balalardy qurdastarymen qaqtyǵys, jaýapsyz mahabbat jáne ózderin ózgelermen salystyrý olardy ózine-ózi qol jumsaýǵa ıtermelegen. Munyń barlyǵy balalardyń psıhologııalyq kómekke, ata-ananyń nazaryna jáne qamqorlyǵyna muqtaj ekenin kórsetedi. Qazirgi ýaqytta tsıfrlyq táýeldiliktiń kúsheıýi, balalardyń vırtýaldy álemge shamadan tys eliktep, óz ómirlerin basqalarmen salystyrýy jaǵdaıdy odan ári ýshyqtyrady», — dedi D. Omarǵalıev.
Eske sala keteıik, budan buryn BQO-da eks-polıtseıdiń qolynan qaza tapqan 30 jastaǵy jigittiń qyzy dúnıege kelgenin jazǵan bolatynbyz.
