BQO-da sońǵy 3 jylda esirtkige qatysty 50-ge jýyq jas qylmystyq jaýapkershilikke tartyldy
ORAL. KAZINFORM — Batys Qazaqstan oblysynda jastardyń esirtkimen aınalysýy alańdatyp otyr.
BQO prokýrorynyń orynbasary Azamat Qustanovtyń málim etkenindeı, sońǵy úsh jylda 14-22 jas aralyǵyndaǵy 49 jas (2023 jyly — 13, 2024 jyly — 16, 2025 jyly — 20) qylmystyq jaýapkershilikke tartyldy.
Azamat Boranbaıulynyń sózine qaraǵanda, sonyń ishinde 39-y esirtki saqtaǵany, 10-y satqany úshin isti boldy. 35-ine aıyptaý úkimi shyǵaryldy.
— Mysaly, bıyl Oral qalalyq sotynyń úkimimen asa iri kólemde psıhotroptyq zattardy satýmen aınalysqan 10-synyp oqýshysy jeti jylǵa bas bostandyǵynan aıyryldy. Jasóspirimniń ózi de esirtkini únemi tutynǵan, — dedi A.Qustanov.
Onyń aıtýynsha, jyl basynan beri esirtki jasyrýmen aınalysqan 35 adam ustalsa, sonyń 15-i — 22 jasqa deıingiler. Úsheýi — kámeletke tolmaǵandar.
— Esirtki jasyratyndar jóninde toqtala keteıin. Bular — ınternet-platforma, ásirese, anonımdi messendjerler men Telegram arnalary arqyly jasyryn túrde esirtki nemese psıhotropty zattardy taratatyn, belgili bir jerlerde qaldyratyn adamdar. Kóbinese muny jastar, sonyń ishinde, kámeletke tolmaǵandar jasaıdy. Jeńil aqshaǵa umtylyp, munyń artynda aýyr qylmys turǵanyn túsinbeıdi. Mundaı áreketter úshin 5 jyldan 20 jylǵa deıin bas bostandyǵynan aıyrý jazasy qarastyrylǵan, — dedi BQO prokýrorynyń orynbasary.
Prokýratýra málimeti boıynsha esirtki bıznesine jáne alaıaqtyqqa baılanysty qarjylyq operatsııalarǵa qatysatyn dropperler de qazirgi kezde qylmystyq jaýapkershilikke tartylady. Dropperler degenimiz — basqa adamdarǵa olardyń ótinishi boıynsha banktik shottaryn, derektemelerin nemese jeke málimetterin beretinder.
Bıylǵy 16 shildede Memleket basshysy zańnamaǵa ózgerister engizý týraly zańǵa qol qoıdy. Osyǵan baılanysty Qylmystyq kodekske alǵash ret banktik shottaryn úshinshi tulǵalarǵa bergeni úshin qylmystyq jaýapkershilikti qarastyratyn 232-1-bap engizildi.
— Buryn mundaı áreketter úshin jaýapkershilik bolmaǵan. Endi jańa baptyń engizilýine baılanysty dropperler bólek qylmystyq jaýapkershilikke tartylady jáne mundaı áreketter úshin 7 jylǵa deıin bas bostandyǵynan aıyrý jazasy qarastyrylǵan. Sonymen qatar Azamattyq kodekske sáıkes jábirlenýshiler zańsyz alynǵan somalardy sot arqyly óndire alady, — dep qosty A.Qustanov.
Eske sala keteıik, budan buryn Batys Qazaqstanda 258 kg astam esirtki zańsyz aınalymnan alynǵanyn jazǵan bolatynbyz.
Sondaı-aq aımaqta tyıym salynǵan zattardy taratýǵa qatysy bar dep kúdikke ilingen 17 jastaǵy óńir turǵyny ustaldy.