BQO-da soǵys kezinde qaza tapqan 15 jaýyngerdiń súıegi qaıta jerlendi
ORAL. QazAqparat – Batys Qazaqstan oblysy Bókeı ordasy aýdanynyń Saıqyn aýylynda Ekinshi dúnıejúzilik soǵys kezinde qaza tapqan 15 jaýyngerdiń súıegi qaıta jerlendi, dep habarlaıdy QazAqparat tilshisi.
Sarbazdar súıekteri bıyl jazda Saıqyn aýyly mańyndaǵy Ravnınnyı razezinde izdestirý jumystary kezinde tabylǵan edi.
On bes jaýyngerdiń súıegi 2 qazan kúni 196-Qyzyl týly Gatchınsk atqyshtar dıvızııasynyń baýyrlastar zıratynda jer qoınyna tapsyryldy.
Qazý jumystaryn júrgizgen Tasqala aýdany Mereı aýylynda turatyn M.Mámetova atyndaǵy izdestirý jasaǵynyń komandıri Sergeı Lapshınniń aıtýynsha, kıtel túımelerinde zákir belgilengendikten, bozdaqtardyń teńizshiler ekendigi anyqtaldy. Biraq medalondary bolmaǵandyqtan, dál kim ekendigin aıyrý ázirge múmkin emes.
Aýdandyq bilim berý bóliminiń basshysy Juban Ǵumarovtyń sózine qaraǵanda, bul jaýyngerler 1942 jyly Stalıngrad maıdanyna kómekke jiberilgen 74-teńiz atqyshtar brıadasynyń sarbazdary dep aıtýǵa bolady. Bomba túsip, dál osy jerde qaza tapqan 37 jaýyngerdiń tizimi belgili. Shamamen 18-22 jas aralyǵyndaǵy 15 bozdaq ta solardyń ishinde. Bolashaqta olardyń aty-jónin anyqtap, eskertkish taqta ornatý, sonymen qatar qazba jumystaryn jalǵastyrý kózdelýde.
2 qazan sondaı-aq Bókeı ordasy aýdanynan túlep ushqan Keńes Odaǵynyń Batyry Mánshúk Mámetovanyń týǵan kúni bolǵandyqtan, onyń eskertkishine gúl shoqtary qoıyldy.
«Mánshúk apamyz nebári 21 jasynda qaza tapsa, 15 jaýynger de onyń turǵylastary edi. Osyndaı órimdeı jastardyń eldi qorǵaý jolynda jan bergenin biz, keıingi urpaq umytýǵa tıisti emespiz. Stalıngrad maıdany tıip turǵandyqtan, bizdiń aýdan soǵys jaǵdaıynda dep jarııalandy. Jaý temirjol boıyn úzdiksiz bombalap jatty, jaýyngerlermen qatar turǵyndar da oqqa ushty. Aldaǵy jyly Jeńiske 75 jyl tolady. Osy oraıda aǵa býyn erligi máńgi úlgi bolyp qala bermek», - dedi aýdan ákimi Nurlan Rahymjanov.
