BQO-da «Smart City» tujyrymdamasyna sáıkes 30 joba júzege asyrylýda
Oblys ákimi Altaı Kólginovtiń aıtýynsha, sonyń negizgileri - mynalar. Birinshiden, balabaqshaǵa balalardy avtomatty túrde bólýdiń júıesi iske qosyldy. Qazirgi kezde balany balabaqshaǵa elektrondy kezek boıynsha joldaýǵa bolady. Balabaqsha meńgerýshileri burynǵydaı bar bos oryndy jasyryp, jaba almaıdy.
Ekinshiden, perzenthanada analar dúnıege ákelgen sábılerin sms-habarlama arqyly tirkeı bastady.
Úshinshiden, medıtsınalyq aqparat júıesi arqyly emdelýshi jeke elektrondy qujatqa qol jetkize alady.
Tórtinshiden, «Kezekshi prokýror» júıesi onlaın túrinde jumys jasaıdy. Azamattar osy arqyly qabyldaýǵa jazylyp, keńes alyp, qadaǵalaý organyna aryz-shaǵymmen júgine alady.
Besinshiden, «Halyqtyq baqylaý» halyqpen keri baılanys júıesi arqyly turǵyndardyń memlekettik organdarmen qarym-qatynasy jaqsara tústi.
Altynshydan, elektrondy «E-KSK» jobasy bastaldy. Endi turǵyndar biryńǵaı esep ortalyǵy arqyly kvıtantsııalar ala alady. PIK tóraǵalary elektrondy túrde esep berip, ashyq jumys jasaıdy.
Jetinshiden, zańdylyq pen qaýipsizdikti arttyrý úshin polıtsııa ekıpajdary kameralarmen jaraqtandyryldy. «Qaýipsiz qala» jobasy boıynsha óńirde 6 myńnan astam beınekamera ornatyldy. Bıyl munyń sany 7,5 myńnan asady. Kameralar joldaǵy, aýlalardaǵy, qoǵamdyq oryndar, sonyń ishinde mektepter men balabaqshalardaǵy qaýipsizdikti baqylap otyratyn bolady.
Segizinshiden, jer qatynastary salasynda oblys jer resýrstarynyń biryńǵaı portaly ashyldy.
Toǵyzynshydan, ashyqtyqty qamtamasyz etý, sybaılas jemqorlyq táýekelderin tómendetý maqsatynda memlekettik qyzmet kórsetetin 22 komıssııa onlaın júıege kóshirildi.
Onynshydan, Oralda ashylǵan «Smart Uralsk» ortalyǵynda kásipkerler men azamattarǵa «bir tereze» qaǵıdaty boıynsha 641 qyzmet kórsetiledi. Sondaı-aq «Qoljetimdi ákimdik» ofısi arqyly qazirdiń ózinde turǵyndarǵa 30 myńnan astam qyzmet kórsetildi.
«2018-2021 jyldar aralyǵynda uıaly baılanys pen ınternet jetkizý jobalary kezeń-kezeńmen júzege asyrylmaqshy. «Tsıfrly Qazaqstan» baǵdarlamasy aıasynda Aqparat jáne kommýnıkatsııalar mınıstrligimen tyǵyz baılanys jasalýda. 92 eldi mekendi ınternetpen qamtý jumystary bastalmaqshy», dedi óńir basshysy.