BQO-da skýtermen jol erejesin buzǵan jasóspirimniń ata-anasynan 4 mln teńge óndirildi

ORAL. KAZINFORM — BQO kámeletke tolmaǵandardyń isteri jónindegi mamandandyrylǵan aýdanaralyq sotynda jol-kólik oqıǵasy saldarynan keltirilgen materıaldyq zalaldy óndirý týraly azamattyq is qaraldy.

BQO sotynyń baspasóz qyzmetinen málim etkenindeı, jasóspirim «Racer» skýterimen qosalqy jolda kele jatyp, jol erejesin buzǵan. Atap aıtqanda, negizgi jolmen kele jatqan Hyundai Santa Fe avtokóligine jol bermeı, soqtyǵysqan.

Saldarynan skýterdiń júrgizýshisi men kámeletke tolmaǵan jolaýshysy dene jaraqatyn alsa, avtokólik ıesi materıaldyq shyǵynǵa qaldy. 

Skýterdiń júrgizýshisine qatysty QR Ákimshilik quqyq buzýshylyq týraly kodeksiniń 610-baby 3-bóligine sáıkes aıyppul salyndy. 

Oǵan qosa aavtokólik ıesi jasóspirimniń zańdy ókilderinen keltirilgen materıaldyq shyǵyn — 5 mln 192,280 myń teńgeni óndirý týraly azamattyq talap aryzben júgindi.

— Sot-taýarlyq saraptama qorytyndysy boıynsha talap aryz ishinara qanaǵattandyryldy. Jasóspirimniń ata-anasynan talapkerdiń paıdasyna 4 mln 192,730 myń teńge, sot saraptamasy ortalyǵyna saraptama júrgizgeni úshin 112 myń 631,17 teńge óndirildi. Sheshim zańdy kúshine endi, — dep habarlady vedomstvodan.

Eske sala keteıik, budan buryn BQO-da 35 mln teńge jymqyrǵan aýrýhana býhgalteri 7 jylǵa sottalǵanyn jazǵan bolatynbyz.