BQO-da skrınıngtik tekserý kezinde 12 myńǵa jýyq áıelden qatersiz isik anyqtaldy

ORAL. KAZINFORM — Batys Qazaqstan oblysynda 2025 jyly júrek-qan tamyrlary aýrýlary, qant dıabeti, glaýkomaǵa 40-76 jas aralyǵynda josparlanǵan 200 021 adam túgeldeı skrınıngtik tekserýden ótkizildi. 

BQO densaýlyq saqtaý basqarmasy basshysynyń orynbasary Almas Júnisbekovtiń óńirlik kommýnıkatsııalar qyzmeti alańynda ótken brıfıngte málim etkenindeı, 7 787 adamnan alǵash ret aýrý anyqtaldy.

Almas Toǵaıbaıulynyń sózine qaraǵanda, sonyń ishinde 5 164-i — arterııalyq gıpertenzııa, 667-si — júrektiń ıshemııalyq aýrýy, 714-i — qant dıabeti, 1 242-si glaýkomaǵa shaldyqqany belgili boldy. Olardyń barlyǵy dıspanserlik esepke alynyp, dárigerdiń baqylaýynda bolyp, tıisti em taǵaıyndaldy.

— Sút bezi obyryna skrınıng 40-76 jas aralyǵyndaǵy áıelder arasynda 2 jylda 1 ret júrgiziledi. Skırıngpen 43 230 áıel (96,2 paıyz) qamtylyp, sút bezi obyry 68 áıelde (46-sy — І kezeń, 22-si — ІІ kezeń) anyqtaldy. Sondaı-aq 11 914 áıelden qatersiz isik tabyldy, — dedi Almas Júnisbekov.

Onyń aıtýynsha, jatyr moıny obyryna 30-74 jas aralyǵyndaǵy áıelder 4 jylda 1 ret tekserýden ótedi. Skrınıngpen 31 217 áıel (89,5 paıyz) qamtylǵan. 12 áıeldiń (9-y — І kezeń, úsheýi — ІІ kezeń) jatyr moıny obyrymen aýyratyny málim boldy. Іsik aldy patologııalar 885 áıelde (2,8 paıyz) tirkeldi.

Basqarma málimetine sáıkes kolorektaldy qaterli isikke skrınıngpen 50-76 jas aralyǵyndaǵy 53 262 er jáne áıel adam (98,7 paıyz) tekserildi. Mundaı obyrǵa 19 adam (beseýi — І kezeń, 12-si — ІІ kezeń, ekeýi — ІІІ kezeń) shaldyqqan. Oǵan qosa 487 adamda (0,9 paıyz) isik aldy patologııalar paıda bolǵan.

Naýqastardyń barlyǵy tirkeý orny boıynsha dıspanserlik baqylaýǵa alyndy.

Eske sala keteıik, budan buryn Batys Qazaqstan oblysynda 25 adamnyń qyzylshamen aýyrǵany rastalǵanyn jazǵan edik.