BQO-da «Syrym» avtomobıl ótkizý beketinde qurylys-montaj jumystary bastalady

ASTANA. KAZINFORM – Batys Qazaqstan oblysynda Reseımen shekarada ornalasqan «Syrym» avtomobıl ótkizý beketin qaıta qurýdy 10 shildede bastaý kózdelip otyr.

BQO kásipkkerler palatasynda ótkizilgen keńeste «QazAvtoJol» UK» AQ BQO fılıaly dırektorynyń mindetin atqarýshy Mırlan Násipovtiń málim etkenindeı, qurylys-montaj jumystarynyń quny 22 mlrd teńgege baǵalanǵan. Onyń sózine qaraǵanda, bıyl 9,9 mlrd teńge bólingen.

- «Syrym» avtomobıl ótkizý beketin qaıta qurý 16 aıǵa eseptelgen. Merdiger retinde QSM ENGINEERING kompanııasy anyqtaldy. Qazirgi kezde tólqujat baqylaý kabınasyn aýystyrý, ýaqytsha ınjenerlik kommýnıkatsııa tartý, ótkizý beketiniń ishinde qorshaý ornatý sııaqty ázirlik jumystary júrgizilip jatyr. Úsh qabatty ákimshilik ǵımaratyn, eki ınspektsııalyq qaraý keshenin salý josparlanyp otyr. Jol qozǵalysy jolaǵy 12-ge deıin ulǵaıtylady, taǵy eki jolaq iri kólemdi kólik úshin jasalmaq, - dedi M.Násipov.

Onyń aıtýynsha, atalmysh ótkizý beketinde júk kólikteriniń kirip-shyǵýyna shekteı qoıylmaıdy. Al jeńil kólikterdi óńirdegi «Tasqala», «Shaǵan» jáne «Aqsaı» beketteri arqyly ótkizý kózdelip otyr.

Eske sala keteıik, budan buryn BQO-da «Syrym» avtomobıl ótkizý beketi 16 aıǵa jabylýy múmkin ekendigin jazǵan bolatynbyz.