BQO-da «Syrym» avtobeketiniń jóndeýge qashan jabylatyny belgisiz

ORAL. KAZINFORM — Batys Qazaqstan oblysynda Reseımen shekarada ornalasqan «Syrym» avtomobıl ótkizý beketiniń qaıta jańǵyrtý jumystaryna qashan jabylatyny belgisiz bolyp otyr.

«QazAvtoJol» UK» AQ BQO fılıalynyń dırektory Asylbek Mardannyń óńirlik kásipkerler palatasynda ótken basqosýda málim etkenindeı, jalpy jobanyń quny — 21 mlrd teńge.

Onyń sózine qaraǵanda, jumys 16 aıǵa eseptelgen. Budan buryn habarlanǵanyndaı, «Syrym» beketin 1 aqpannan jabý kózdelse, bul merzim keıinge qaldyrylyp otyr. 

Munyń sebebi merdigerler arasynda sot rásimi júrip jatqanyna baılanysty. 2024 jyldyń aıaǵynda merdiger anyqtalǵanymen, jeńilip qalǵany munymen kelispeı, sotqa berdi. Sot aıaqtalǵannan qurylys-montaj jumystarynyń bastalý ýaqyty anyqtalatyn bolady. 

— Joba boıynsha ótkizý beketi tolyqtaı jańartylady. Osyǵan deıin 6 jolaq bolsa, endi 12-ge (altaýy — kirý, qalǵan jartysy — shyǵý jolaǵy) jetpekshi. Jaıaý júrginshiler bólek, avtokólikter bólek ótedi. Sonymen qatar, úlken ákimshilik ǵımaraty salynady. Qazirgi kezde syrtta atqarylyp júrgen jumystyń bári ǵımarat ishinde jasalatyn bolady. «Syrym» ótkizý beketin tolyq jappaý, bir jolaǵyn bolsa da qaldyrý jóninde usynystar aıtylyp jatyr. Buǵan baılanysty sheshimdi QR UQK Shekara qyzmeti qabyldaıdy, — dedi A.Mardan.

«Saıfýlın» JK dırektory Rýstam Saıfýlın osy máselege qatysty óz pikirin bildirdi.

Onyń aıtýynsha, halyqaralyq tasymaldaýshylar úshin «Syrym» negizgi ótkizý beketi bolyp esepteledi. 

— Eger beket jabylatyn bolsa, qalǵandarynda jaǵdaı qıyndaıdy. Óıtkeni ol beketter mundaı tasqynǵa daıyn emes. Qazir biz Eýropaǵa aıyna bir ret júk tasymaldaýmen baryp qaıtsaq, beket jabylǵannan keıin eki aıda bir ret qatynaýǵa týra keledi. Bıýdjettik aýdarymdar, jalaqy jáne nesıeni tóleı almaımyz. Biz shekarany tolyq jappaı, avtokólikterdiń ótýi úshin jolaqtar qaldyrýdy usynamyz, — dedi R.Saıfýlın.

Eske sala keteıik, budan buryn BQO-da «Syrym» avtomobıl ótkizý beketi 16 aıǵa jabylýy múmkin ekendigin jazǵan edik.