BQO-da sıyr etiniń baǵasyn asyryp satqan kásipker jaýapqa tartyldy
ORAL. KAZINFORM — Oral qalasynda kásipkerlik nysanynyń sıyr etiniń baǵasyn asyryp satqany anyqtaldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, áleýmettik mańyzy bar azyq-túlik taýarlarynyń baǵasyn turaqtandyrý máselesi Memleket basshysynyń 2021 jylǵy 1 qyrkúıektegi «Halyq birligi jáne júıeli reformalar — el órkendeýiniń berik negizi» atty Qazaqstan halqyna Joldaýyn iske asyrý jónindegi jalpyulttyq is-sharalar josparyna engizilgeni málim.
Onyń sózine qaraǵanda, 2025 jylǵy jeltoqsanda QR Saýda jáne ıntegratsııa mınıstriniń buıryǵymen áleýmettik mańyzy bar azyq-túlik taýarlarynyń tizbesi 19-dan 31 pozıtsııaǵa deıin keńeıtildi. Atalǵan tizbege súıekti sıyr eti, súıeksiz sıyr eti, qoı eti (súıeksiz etti qosa alǵanda) jáne jylqy eti (súıeksiz etti qosa alǵanda) engizildi.
— «Saýda qyzmetin retteý týraly» QR Zańynyń 9-babyna sáıkes, áleýmettik mańyzy bar azyq-túlik taýarlaryn ótkizý kezindegi shekti saýda ústemesiniń mólsheri óndirýshiniń bosatý baǵasynan nemese kóterme jetkizýshiniń satyp alý baǵasynan 15 paıyzdan aspaýǵa tıis. Degenmen, bul talapty barlyq bıznes nysandary birdeı saqtaı bermeıdi. Atap aıtqanda, Oralda kásipkerlik nysany sıyr etiniń jaýyryn bóligin 29,4 paıyz saýda ústemesimen satqan. Osyǵan baılanysty departament kásipkerge qatysty ákimshilik is qozǵap, jetkizýshi aıyppul túrindegi ákimshilik jaýapkershilikke tartyldy, — dedi E.Qımatova.
Onyń aıtýynsha, áleýmettik mańyzy bar azyq-túlik taýarlary baǵasynyń negizsiz ósýi baıqalǵan jaǵdaıda tutynýshylar e-Otinish platformasy arqyly nemese departamentke mekenjaı boıynsha júgine alady. Ótinishke taýardyń baǵasy kórsetilgen fotosýretin jáne bar bolsa, taýardy satyp alǵany týraly chekti qosa berý qajet.
Eske sala keteıik, budan buryn Oralda iri kompanııanyń kókónis baǵasyn asyryp satqany anyqtalǵanyn jazǵan bolatynbyz.
