BQO-da sybaılas jemqorlyqqa barǵan 4 memlekettik qyzmetshi sottaldy

ORAL. KAZINFORM — Sybaılas jemqorlyq derekterine monıtorıng nátıjesinde bıyl 4 memlekettik qyzmetshige qatysty sot úkimi shyqqandyǵy belgili boldy.

QR Memlekettik qyzmet isteri agenttigi BQO boıynsha departamentiniń basshysy Murat Baısalovtyń óńirlik kommýnıkatsııalar qyzmeti alańynda ótken brıfıngte málim etkenindeı, olardyń úsheýi — ákimshilik memlekettik qyzmetshi, bireýi — quqyq qorǵaý organynyń qyzmetkeri.

Departament basshysynyń aıtýynsha, bıylǵy bes aıda ádep jónindegi keńestiń 5 otyrysy ótkizilip, 28 másele qaraldy.

Sonyń ishinde 18 profılaktıkalyq máseleni qaraý qorytyndysymen qyzmettik tártipti nyǵaıtý, sybaılas jemqorlyqtyń aldyn alýǵa jáne qyzmettik etıka normalaryn buzýdyń aldyn alýǵa baǵyttalǵan sharalardy iske asyrý boıynsha 57 usynym oblystyń memlekettik organdaryna joldanyp, onyń barlyǵy oryndaldy.

— Tártiptik isterdi qaraý nátıjeleri boıynsha 9 laýazymdy qyzmetkerge tártiptik jaza qoldanyldy. Atap aıtqanda, Ádep kodeksiniń talaptaryn saqtamaǵany úshin 4 adamnyń bireýine eskertý, taǵy bireýine qatań sógis, ekeýine qyzmetine tolyq sáıkes emestigi týraly eskertý berildi. Sondaı-aq memlekettik qyzmetke kir keltiretin teris qylyq jasaǵany úshin tórt memlekettik qyzmetshige qyzmetine tolyq sáıkes emestigi týraly eskertý jasalsa, bireýi jumysynan bosatyldy, — dedi M.Baısalov.

Departament málimetine sáıkes oblysta 382 memlekettik organ bolsa, olardaǵy qyzmetshilerdiń naqty sany — 3 291. Bos laýazymdar sany — 168.

Eske sala keteıik, budan buryn BQO-da balaǵat sóz aıtqan aýyl ákiminiń tártiptik jaýapkershilikke tartylǵanyn jazǵan bolatynbyz.