BQO-da shybyn-shirkeımen kúres sharalaryna 49 mln. teńge jumsalmaq
ORAL. QazAqparat - Batys Qazaqstan oblysynda shybyn-shirkeımen kúres sharalaryna 49 mln. teńge jumsalmaq. Bul týraly búgin Ortalyq kommýnıkatsııalar qyzmeti óńirlik fılıalynda BQO tutynýshylar quqyǵyn qorǵaý departamentiniń basshysy Jaıdar Qurmanov málim etti, dep habarlaıdy «QazAqparat» HAA tilshisi.
Onyń aıtýynsha, osy sharamen qamtylatyn aýmaqty anyqtaý jumystary 1-15 sáýir aralyǵynda júrgiziledi. Sodan keıin aýa raıy men sý qoımalarynda masanyń ósip-ónýine qaraı óńdeý jumystary bastalady. Baǵdarlama ákimshisi BQO energetıka jáne turǵyn úı-kommýnaldyq sharýashylyq basqarmasy konkýrs ótkizip, ónim jetkizýshi mekemeni anyqtaıdy.
J.Qurmanovtyń pikirinshe, shybyn-shirkeı men bezgekke qarsy josparly óńdeý jumystary respýblıkalyq bıýdjetten bólinetin qarjynyń jetkiliksizdigine baılanysty az nátıje berýde. 2009 jylǵa deıin jergilikti qazynadan bólingen qarajatqa 10-15 myń gektar aýmaqqa deıin óńdeý jumystary júrgizilip, jaǵdaıdy turaqtandyrýǵa septigin tıgizgen bolatyn. Al 2016 jyly berilgen 48,9 mln. teńge tek Oral qalasy mańyndaǵy 6600 ga aýmaqty áýe kóliginsiz, jer ústi ýlaý kóligimen ǵana óńdeýge múmkindik berdi. Bıyl óńirde qysta qardyń kóp túsýine baılanysty ylǵaldyń molaıyp, sonyń saldarynan shybyn-shirkeıdiń de kóbeıip ketýi ábden yqtımal.
