BQO-da Shyńǵyrlaý ózeni arnasynan asyp, bir aýylǵa sý kirdi
ORAL. KAZINFORM — Batys Qazaqstan oblysynda Shyńǵyrlaý ózeni arnasynan asyp, Bórli aýdany Aqsý aýylynda úılerge sý kirdi.
«Qazgıdromet» RMK BQO fılıalynyń dırektory Tilegen Shapanov bergen málimetke qaraǵanda, Shyńǵyrlaý ózeni Bórli aýdany Keńtúbek aýyly tusynda 767 santımetrge kóterilip, qaýipti deńgeıden (700 sm) asyp ketti.
Sondaı-aq oblystaǵy basqa ózenderde de sý deńgeıi kóterilý ústinde. Mysaly, Derkól ózeni Báıterek aýdany Beles aýyly tusynda bir táýlikte 99 santımetrge kóterilip, 530 santımetrge (qaýipti deńgeı – 600-650 sm) jetti. Sol sekildi Shaǵan ózeni Chývashın tusynda 972 santımetr (qaýipti deńgeı – 1280-1300 sm) boldy. Bykovka ózeni Qurmanǵazy aýyly tusynda 806 santımetrge joǵarylap, qaýipti deńgeıge (810 sm) jaqyndap qaldy.
Oblystyń bas ózeni – Jaıyq Oral qalasy tusynda 41 santımetrge (219, qaýipti shegi – 850 sm) kóterildi.
Sonymen qatar Kaztalov aýdanynda Qaraózen men Saryózenge de sý kele bastady.
Bórli aýdanynyń ákimi Erkebulan Ihsanovtyń aıtýynsha, Shyńǵyrlaý ózeniniń tasýy saldarynan keshe Aqsý aýylyndaǵy shamamen 46 úıge sý kirdi. 150-deı adam mektepke evakýatsııalandy.
«Keńtúbek ázirge aman. Qazirgi kezde Shyńǵyrlaý ózeninde muz jarý jumystary júrgizilýde. Ózim sý tasqynyna baılanysty Aqsý aýylyndamyn. Aqsaı qalasynda da erigen qar sýyna tosqaýyl qoıý baǵytynda jumystar atqarylyp jatyr», dedi E.Ihsanov.
Eske sala keteıik, budan buryn sý tasqynyna baılanysty BQO-nyń taǵy eki aýdanynda tótenshe jaǵdaı jarııalanǵanyn jazǵan bolatynbyz.
