BQO-da shyǵynǵa ushyraǵan 1 200-ge jýyq mal basy úshin ótemaqy tolyqtaı tólendi
ORAL. KAZINFORM – Batys Qazaqstan oblysynda sý tasqynyna baılanysty tótenshe jaǵdaı saldarynan ólgen mal basynyń sanyn anyqtaý jáne óteý jumystary aıaqtalýǵa jaqyn.
BQO ákiminiń orynbasary Qalııar Aıtmuhambetovtiń Kazinform tilshisine málim etkenindeı, aýdandarda qurylǵan arnaıy komıssııalar sý tasqyny saldarynan 162 ótinish boıynsha 2 457 maldyń shyǵynǵa ushyraǵanyn rastady.
Sonyń ishinde 368-i – iri qara, 92-si – jylqy, 1 743-i – usaq mal, 116-sy – shoshqa, 138-i – úı qustary.
Qalııar Shadııarulynyń sózine qaraǵanda, veterınarlyq qyzmet jergilikti ákimdiktermen birlesip, ólgen janýarlardyń ólekselerin joıý jumystaryn tolyqtaı júrgizdi. Janýarlardyń ólekselerin joıý jumystary órteý arqyly arnaıy qazylǵan shuńqyrlarǵa kómilip, kádege jaratý aktisi toltyryldy.
Oblys ákimi orynbasarynyń aıtýynsha, esepteý jumystary Qazaqstan Respýblıkasynyń Premer-mınıstri Oljas Bektenovtyń tóraǵalyq etýimen ótken sý tasqynyna qarsy is-sharalardy úılestirý jáne 2024 jylǵy sý tasqyny kezeńiniń saldaryn joıý jónindegi respýblıkalyq shtab otyrysy bekitken sý tasqynynan shyǵyn (ólim) bolǵan aýyl sharýashylyǵy janýarlarynyń qunyn óteý jónindegi algorıtmine sáıkes atqaryldy.
Shyǵyn kólemi Ulttyq statıstıka bıýrosy jarııalaıtyn aýyl sharýashylyǵy janýarlarynyń túrleri men jynystyq-jas toptary bólinisinde olardyń naryqtyq quny týraly derekter negizinde aıqyndaldy.
«Aıqyndalǵan shyǵyndar negizinde oblys bıýdjetiniń tótenshe jaǵdaılar rezervinen sý tasqynynan ólgen aýyl sharýashylyǵy janýarlar qunyn óteý úshin 187,5 mln teńge bólindi. Atalǵan qarajatqa aýyl sharýashylyǵy janýarlaryn birdeılendirý júıesinde tirkelgen 1 177 mal basy úshin ótemaqy tolyqtaı tólendi. Aýyl sharýashylyǵy janýarlarynyń birdeılendirý júıesinde tirkelmegen mal bastaryna shyǵyndy óteý bıýdjettik emes kózderden júrgizilýde. Kúni búginge deıin 178 bas mal, sonyń ishinde 27 bas iri qara, 139 bas qoı-eshki jáne 12 bas jylqy tólderi óteldi. Osy aptanyń sońyna deıin mal shyǵynyn óteý jumystaryn tolyq aıaqtaýdy josparlap otyrmyz», - dedi Q.Aıtmuhambetov.
Eske sala keteıik, budan buryn Oral qalasynda 350-den astam saıajaı úıi turýǵa jaramsyz ekendigin jazǵan bolatynbyz.
