BQO-da sheteldik azamat esirtki satatyn ınternet-dúken uıymdastyrǵan

ORAL. KAZINFORM — «Dármek» jáne «Quqyqtyq tártip» jedel aldyn alý is-sharalary barysynda BQO PD esirtki qylmysyna qarsy is-qımyl basqarmasynyń qyzmetkerleri jas jigitti ustady.

BQO polıtsııa departamentiniń baspasóz qyzmetinen málim etkenindeı, 28 jastaǵy shetel azamaty jalǵa alynǵan kottedjde qolǵa tústi. Ol esirtki quraldaryn taratýǵa arnalǵan ınternet-dúkendi uıymdastyrdy degen kúdikke ilindi.

Jeke tintý kezinde odan ashyq qońyr tústi untaq zat salynǵan eki orama tárkilendi.

Sonymen qatar kottedjdi tintý barysynda osyndaı zat salynǵan ZIP-paket, iPhone 11 telefony jáne sıntetıkalyq esirtki taratýǵa paıdalanylǵan bolýy múmkin materıaldary bar Acer noýtbýk tabyldy. 

— Saraptama tárkilengen zattyń jalpy salmaǵy 2,62 gramm mefedron ekenin anyqtady. Atalǵan derek boıynsha qylmystyq is qozǵalyp, tergeý amaldary júrgizilip jatyr, — dep habarlady vedomstvodan.

Eske sala keteıik, budan buryn BQO-da 17 jastaǵy stýdenttiń esirtki taratýmen aınalysqanyn jazǵan edik.