BQO-da shetel azamaty júk kóligimen trassada qalyp qoıdy
ORAL. QazAqparat – Batys Qazaqstan oblysynda júk kóligimen jolda qalyp qoıǵan shetel azamatyna kómek kórsetildi, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen málim etkenindeı, 26 jeltoqsan kúni tańerteń Tasqala aýdany Dostyq aýyly mańynda Belarýs eliniń 57 jastaǵy azamaty aıdap kele jatqan «Volvo» júk kóligi synyp, jolda qalǵan.
Saǵat 11.33-te oqıǵa ornyna qutqarýshylar jetip, olar kóliktiń otynyn (dızel) jylytyp, qajetti qural-saımandarmen qamtamasyz etti. Kúnniń sýyqtyǵyna baılanysty qatty tońyp qalǵan júrgizýshini qutqarýshylar Tasqala aýylyndaǵy jylytý pýnktine aparyp, tamaqtandyryp, jaǵdaıyn jasaǵan.
Taratylǵan aqparatqa súıensek, kólik jóndeldi. Júrgizýshi jeksenbi kúni jolǵa shyǵatyn bolady.
«Ózine shuǵyl járdem bergeni úshin Belarýs eliniń azamaty Tasqala aýdany ákimdigi men qutqarýshylarǵa alǵysyn bildirdi», - dedi departamentten.
Eske sala keteıik, budan buryn Batys Qazaqstanda jaıaý burqasyn soǵyp, kóktaıǵaq bolatynyn jazǵan edik.
Óńirde sońǵy kúnderi aýa raıynyń buzylatyny týraly osyndaı eskertý úzdiksiz jarııalanyp keledi.
