BQO-da shekaradan 25 myńǵa jýyq adam ótti
ORAL. QazAqparat – Batys Qazaqstan oblysynda Reseımen shektesetin «Tasqala», «Syrym», «Jánibek» jáne «Aqsaı» avtoótkelderinen 1 qazan men 12 qarasha aralyǵynda 24 477 adam shekaradan ótti, dep habarlaıdy QazAqparat tilshisi.
BQO densaýlyq saqtaý basqarmasynyń baspasóz qyzmeti málim etkenindeı, sonyń ishinde testiden ótkeni jóninde anyqtamasy joq 932 adam eki kúndik karantınge jatqyzyldy.
Olardan synama alynǵan kezde 22 adamnan koronavırýs tabyldy.
Jalpy, óńirde kovıd juqtyrǵandar sany 7 352-ge jetse, sonyń 6 922-si jazylyp shyqty. 128 adam kóz jumdy.
Pnevmonııaǵa shaldyqqan 101 adam statsıonarda bolsa, 45-i ambýlatorlyq em qabyldap jatyr. Jyl basynan beri pnevmonııadan 223 adam qaıtty. Kúni búgin juqpaly aýrýlar statsıonarlarynda 124 adam emdelýde. 24 adam karantındik statsıonarda jatyr. 8 adam jansaqtaý bóliminde.
Batys Qazaqstan oblysynda indetke qarsy kúreske qajetti qosymsha medıtsınalyq qural-jabdyqtar satyp alynýda. Respýblıkalyq jáne jergilikti bıýdjet esebinen barlyǵy 138 qural-jabdyq alynbaqshy. Sonyń ishinde 15 ókpeni jasandy jeldetý apparaty birer kúnde jetkiziledi. Osy aıda 7 tsıfrly rentgen apparatyn alý úshin «Aktıýbrentgen» AQ-men kelisim jasalǵan. Buǵan deıin eki ottegi stansasy oblystyq jáne Oral qalalyq kópbeıindi aýrýhanalarǵa ornatylsa, taǵy bireýin osy aıdyń aıaǵynda Bórli aýdandyq aýrýhanasyna qoıý kózdelýde. 52 perfýzor osyǵan deıin ákelinse, taǵy 9-y 15 qarashaǵa deıin jetkiziledi.
Aýdandyq aýrýhanalar úshin 9 jyljymaly medıtsına kesheni satyp alyndy.
Sondaı-aq Oral qalasynda quny 7,2 mlrd teńge turatyn modýldik juqpaly aýrýlar aýrýhanasy salynyp jatqany belgili. Ony osy aıdyń aıaǵynda paıdalanýǵa berý kózdelýde.
Oblysta qazirgi tańda 173 ÓJJ apparaty, 506 ottegi kontsentratory, 10 kompıýter tomografy, 47 rentgen apparaty, 775 oksımetr, 198 ottegi kózi, 172 Bobrov apparaty bar.
Eske sala keteıik, BQO-da oqýshydan koronavırýs anyqtalǵan mektep karantınge jabyldy.
