BQO-da shegirtkege qarsy 455 myń gektar jer hımııalyq óńdeýden ótkizilmek

ORAL. KAZINFORM — Batys Qazaqstan oblysynda bıyl shegirtkege qarsy barlyǵy 455 myń gektar jerge hımııalyq óńdeý jumystaryn júrgizý kózdelip otyr. 

BQO aýyl sharýashylyǵy basqarmasynyń basshysy Jasulan Halıýllınniń málim etkenindeı, sonyń 229,3 myń gektary — úıirli shegirtkeler, 225,7 myń gektary saıaq shegirtkelerge qarsy óńdeletin bolady. 

Onyń sózine qaraǵanda, saıaq shegirtkelerge qarsy 225,7 myń gektar jerde óńdeý jumystary jergilikti bıýdjet esebinen atqarylady. 

— Ol úshin qajetti qarajat bólinip, búgingi tańda óńdeý jumystaryn júrgizetin mekemeler anyqtaldy. Atap aıtqanda, «Pest Mosq treatment» JShS («Zııankestermen kúresý» JShS) Aqjaıyq, Báıterek, Bórli, Shyńǵyrlaý, Syrym, Terekti aýdandarynda 171,5 myń gektarǵa óńdeý jumystaryn júrgizedi. Sondaı-aq «ZapKazFýmıgatsııa» JShS Tasqala, Jánibek jáne Kaztalov aýdandary men Oral qalasy aýmaǵynda 33,3 myń gektardy óńdeıdi. Al «Magtoksın» JShS Qaratóbe, Bókeı ordasy jáne Jańaqala aýdandarynda 20,9 myń gektar jerde osyndaı jumystardy atqarady, — dedi J.Halıýllın.

Basqarma basshysynyń aıtýynsha, úıirli shegirtkelerge qarsy fıtosanıtarlyq is-sharalardy respýblıkalyq bıýdjet esebinen Agroónerkásip keshenindegi oblystyq aýmaqtyq ınspektsııa uıymdastyrady. Qazirgi ýaqytta ortalyqtandyrylǵan memlekettik satyp alý rásimderi ótkizilýde. 

Eske sala keteıik, budan buryn Batys Qazaqstanda barlyq egis kólemi 626 myń gektar bolatynyn jazǵan edik.