BQO-da sharýa qojalyqtary basshylarynan para alǵan sheneýnik sottaldy
BQO sybaılas jemqorlyqqa qarsy qyzmetinen túsken málimetke qaraǵanda, Qaztalov aýdany kásipkerlik jáne aýyl sharýashylyǵy bóliminiń bas mamany A.Ǵızatýllın 7 jyl 6 aı merzimge bas bostandyǵynan aıyrý jazasyna kesildi.
Sonymen qatar ol Qaztalov aýdandyq sotynyń úkimimen ómir boıyna memlekettik qyzmet atqarý quqyǵynan aıyryldy.
Úkim zańdy kúshine engen joq.
A.Ǵızatýllın 2018 jyly qyzmet babyn asyra paıdalana otyryp, sharýa qojalyqtary basshylarynan 390 myń teńge kóleminde para alǵan. Osy qarjyǵa ol jaıylymdardy sýlandyrý ınfraqurylymyn qurý jáne mal sharýashylyǵyn sýmen qamtamasyz etý shyǵyndaryn óteý úshin sharýa qojalyqtarynyń kedergisiz demeýqarjy alýyna kómektesken.
Atap aıtqanda, 2017-2021 jyldarǵa arnalǵan QR agroónerkásip keshenin damytý memlekettik baǵdarlamasy aıasynda birqatar sharýa qojalyqtarynda qudyqtar qazylǵan. Sony teksergen A.Ǵızatýllın qudyqtyń tereńdigin ólshemeı, tek syrtqy tekserý jáne sýdyń bar-joǵyn qaraýmen shektelgen. Qudyqtyń tereńdigi sáıkes kelmese de, sharýa qojalyqtarynan para alyp, qudyqtar demeýqarjy alýǵa saı keledi dep kórsetken.
Atalǵan qylmystyń jasalýyna yqpal etken jaǵdaılardy joıý jóninde sharalar qabyldaý maqsatynda oblys ákimi apparatyna QR Qylmystyq protsess júrgizý kodeksiniń 200-baby tártibinde tıisti usynym jiberildi.
Sonymen qatar tıisti baqylaýdyń joqtyǵy jáne qaraýyndaǵy qyzmetkerlermen aldyn alý jumystarynyń álsizdigi úshin Qaztalov aýdany kásipkerlik jáne aýyl sharýashylyǵy bólimi basshysyn tártiptik jaýapkershilikke tartý týraly máseleni qaraý usynyldy.