BQO-da Shalqar kólinde tórt adam qutqaryldy
ORAL. QazAqparat - Shalqar kólinde tórt birdeı jas jigit qutqaryldy, dep habarlaıdy «QazAqparat» tilshisi.
BQO TJ departamenti jedel qutqarý jasaǵynyń bas qutqarýshy-psıhology Láıla Ábdirahmanovanyń aıtýynsha, Terekti aýdany Saryómir aýylyndaǵy №5 qutqarý bólimshesiniń qyzmetkerleri kóldiń jaǵasynan 1,5 shaqyrymdaı jerde aǵyp bara jatqan úrmeli matrasty baıqap qalady. Sóıtse, ústinde tórt adam bar matrasty kúshti jel jaǵadan alysqa alyp ketken eken. Olardy qutqarýshylar jaǵaǵa alyp shyqty. Jaǵdaılary qanaǵattanarlyq bolǵandyqtan, medıtsınalyq kómek kórsetilgen joq. Degenmen olarǵa sýdaǵy qaýipsizdik erejesin túsindirýge týra keldi.
Eske sala keteıik, budan buryn Oral qalasynda Shaǵan ózeninde 12 jáne 5 jasar bala qutqarylǵan bolatyn.
