BQO-da Shaǵan ózeninde sýdyń túsi nege ózgerdi — ekologııa departamenti jaýap berdi
ORAL. KAZINFORM — Oral qalasy mańynda ornalasqan Báıterek aýdany Asan aýyly tusynda Shaǵan ózenindegi sýdyń jasyldanyp ózgergeni týraly áleýmettik jelide beınejazba tarady.
Turǵyndar osy jaǵdaıǵa baılanysty pikir bildirdi. Keıbireýleri muny tabıǵatpen baılanystyrsa, ekinshisi káriz sýy quıylýy múmkin deıdi.
Atalǵan máselege oraı Kazinform tilshisi BQO boıynsha ekologııa departamentine arnaıy saýal joldaǵan edi.
Departamenttiń zerthanalyq-taldamalyq baqylaý bóliminiń mamandary Asan aýyly aýdany «Rancho» JK tusyndaǵy Shaǵan ózeni jaǵalaýyna bardy. Beınejazbada sý betinde kóbiktiń paıda bolǵany kórsetilgen edi.
Departament málimetine qaraǵanda, aqparatty tekserý barysynda zerthanalyq zertteýler júrgizý úshin sýdan synama alyndy.
— Tekserý nátıjesinde sýdyń jasyl tústi ekendigi, basqa ıistiń joqtyǵy anyqtaldy. Sý betinde qospa, kóbik, munaı jáne basqa lastaýshy belgiler tabylǵan joq. Sýdyń jasyl túsi tabıǵı ózgeristerge, ıaǵnı aǵys jaı, kún ystyq bolǵan jaǵdaıda ósimdikterdiń damýyna baılanysty bolýy múmkin. Mundaı jaǵdaı jazǵy kezeńge tán. Zerthanalyq zertteýler qorytyndysyna sáıkes lastaýshy zattardyń shekti ruqsat etilgen kontsentratsııadan asýy anyqtalǵan joq, — delingen resmı jaýapta.
Eske sala keteıik, budan buryn BQO-da tabylǵan medıtsınalyq qaldyqtardyń jaı-japsary belgili bolǵanyn jazǵan edik.
