BQO-da Shaǵan ózenindegi kópirdiń jaıaý júrginshiler bóligine zaqym kelgen
ASTANA. KAZINFORM — «QazAvtoJol» UK baspasóz qyzmeti Shaǵan ózeni ústindegi kópirge qatysty jaǵdaı baqylaýda ekenin málimdedi.
2026 jylǵy 30 sáýir kúni «Aqtóbe — Oral — Reseı Federatsııasy shekarasy» respýblıkalyq mańyzy bar avtomobıl jolynyń 247-shaqyrymynda josparly patrýldeý barysynda Shaǵan ózeni arqyly ótetin kópirdiń jaıaý júrginshiler bóligine zaqym kelgeni anyqtaldy.
Aldyn ala málimetterge sáıkes, zardap shekkender joq. Kópirdiń negizgi júris bóligi men kótergish konstrýktsııalaryna zaqym kelmegen, kólik qozǵalysy shtattyq rejımde júzege asyrylyp otyr.
Mamandardyń boljamynsha, jaıaý júrginshiler bóligindegi jekelegen metall elementterdiń korrozııalyq tozýy zaqymdanýǵa sebep bolýy múmkin.
— Naqty qorytyndy qosymsha tehnıkalyq tekserý nátıjesinde belgili bolady. Oqıǵa ornynda jol qozǵalysy qaýipsizdigin qamtamasyz etý maqsatynda jedel sharalar qabyldanyp, ýaqytsha qorshaýlar men qajetti tehnıkalyq quraldar ornatyldy, — delingen habarlamada.
Atalǵan kópir 1962 jyly paıdalanýǵa berilgen. Nysannyń paıdalaný merzimin eskere otyryp, qazirgi ýaqytta ony kúrdeli jóndeýden ótkizý máselesi belgilengen tártippen qarastyrylyp jatyr. Jobany qarjylandyrý boıynsha tıisti usynystar aǵymdaǵy jyldyń basynda ýákiletti memlekettik organǵa joldanǵan.
Budan buryn Pavlodarda salynyp jatqan jańa kópir taǵy da otqa oranǵanyn jazdyq.
