BQO-da sessııa otyrysynda daýys kótergen aýyl ákimine qatań sógis berildi

ORAL. KAZINFORM — QR Memlekettik qyzmet isteri jónindegi agenttigi BQO boıynsha ádep keńesiniń kezekti otyrysynda ádep talaptaryn saqtamaý derekteri boıynsha memlekettik qyzmetshilerdiń tártiptik isteri talqyǵa tústi.

QR Memlekettik qyzmet isteri jónindegi agenttiginiń BQO boıynsha departamentiniń málimetine qaraǵanda, Jańaqala aýdany Pıatımar aýyldyq okrýginiń ákimi Baýyrjan Ramazanov aýdandyq máslıhat sessııasynyń otyrysynda qatysýshylarǵa daýys kóterip, «Ketshi-eı, basty qatyrmańdar!» degen. 

Ádep keńesiniń otyrysynda B.Ramazanov jınalystarǵa únemi osy adamdardyń kelip, kedergi keltiretinin, sondyqtan álgindeı sózdi aıtqanyn jetkizdi. 

Departament basshysy, ádep jónindegi keńes tóraǵasy Murat Baısalov aýyl ákiminiń tártiptik isi 2024 jyly da qaralǵanyn eske salyp, odan sabaq almaǵanyna ekpin túsirdi.
Ádep keńesi B.Ramazanovqa qatań sógis túrindegi tártiptik shara qoldaný týraly sheshim qabyldady.

Sol sekildi Báıterek aýdany sáýlet, qala qurylysy jáne qurylys bóliminiń basshysy Artýr Baıahatov jer komıssııasy otyrysynda ádepke jaraspaıtyn sóz aıtqan. Oǵan eskertý túrindegi tártiptik shara berý jónindegi usynys keńes músheleriniń basym daýsymen qoldaý tapty. 

Otyrystyń qorytyndysy boıynsha qyzmettik tártipti nyǵaıtý jáne ádep mádenıetin arttyrý baǵytynda tıisti usynymdar qabyldanyp, memlekettik organdarǵa naqty tapsyrmalar berildi. 

Eske sala keteıik, budan buryn Batys Qazaqstan oblysynda ádep normasyn buzǵan aýyl ákimi sógis alǵanyn jazǵan bolatynbyz.