Aqmola oblysynda qurylysqa salynǵan qarjyny jymqyrý boıynsha tergeý júrip jatyr
ASTANA. KAZINFORM – Qarjylyq monıtorıng agenttigi (QMA) Aqmola oblysy boıynsha departamenti Kókshetaý qalasynda ınjenerlik jeliler men abattandyrý nysandaryn salýǵa bólingen bıýdjet qarajatyn jymqyrý faktisi boıynsha tergeý júrgizip jatyr.
Agenttiktiń baspasóz qyzmeti taratqan málimetterge qaraǵanda, 2020 jyly «Kókshetaý qalasynyń qurylys bólimi» MM men merdiger uıymdar - «TAU PROJEKT» JShS jáne «SEM-StroıEnergoMontaj» JShS arasynda bekitilgen jobalyq-smetalyq qujattama aıasynda qurylys-montaj jumystaryn oryndaý jáne tehnıkalyq qadaǵalaý jóninde kelisimsharttar jasalǵan.
Alaıda merdiger kompanııalardyń benefıtsıary oryndalǵan jumys kólemin ádeıi arttyrý shemasyn uıymdastyrǵan.
Qabyldaý aktilerine is júzinde oryndalmaǵan nemese tolyq oryndalmaǵan jumystar týraly jalǵan málimetter engizilgen.
Sonyń saldarynan qujat júzinde rastalǵanymen, sý burý júıesiniń negizin daıyndaý, aryq bloktaryn ornatý, káriz-sorǵy stantsııasyn jetkizý jáne montajdaý jumystary naqty oryndalmaǵan.
Óz kezeginde Qurylys bóliminiń basshysy naqty oryndalǵan jumys kólemi jobalyq sheshimderge sáıkes kelmeıtinin bile tura, jalǵan aktilerge qol qoıyp, qarjylandyrýdy toqtatý jáne sharttardy buzý sharalaryn qabyldamaǵan.
Qol qoıylǵan qujattar negizinde merdiger uıymdarǵa bıýdjet qarajaty aýdarylyp, keıin olardy zańdastyrý maqsatynda qarajat «MAZHERUS» JShS jáne «Tamila Invest» JShS arqyly qaıta bólingen.
Memleketke keltirilgen zalal 160 mln teńgeden asty.
Sot sanktsııasymen kúdiktilerdiń múlkine, onyń ishinde 10 avtokólikke, 3 jer ýchaskesine jáne bir páterge tyıym salyndy.
Kúdiktilerge qatysty qamaýǵa alý jáne úıqamaq túrindegi bultartpaý sharalary qoldanyldy. Tergeý júrip jatyr.
Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Osyǵan deıin QMA ınvestıtsııa salý degen jeleýmen 620 mln teńgeni qoldy etý isi boıynsha tergeý júrgizip jatqany týraly jazdyq.
