BQO-da Senat depýtatymen kezdesýde jaıylymdardy retteý kerektigi aıtyldy
ORAL. QazAqparat - Óńirde jumys saparymen júrgen QR Parlamenti Senatynyń depýtaty Erbolat Muqaev Syrym aýdanynda áleýmettik nysandar jumysymen tanysyp, kásipkerlermen kezdesti, dep habarlaıdy «QazAqparat» HAA tilshisi.
Sharada aýdan ákimi Abat Shynybekov Syrymda kásipkerlik salasynyń damýyna barynsha qolaıly jaǵdaı jasalyp otyrǵanyn jetkizdi.
Senat depýtaty sońǵy on bes jylda el ekonomıkasy órge basyp, kásipkerlik salasy da óziniń jańa baǵyt-baǵdaryn aıqyndaǵanyn atap ótti. Bul tyń úrdisten aýyl kásipkerleri de syrt qalmaýy tıis.
Kezdesý barysynda kásipkerler ózekti máselelerdi kóterip, ásirese, mal jaıylymyna baılanysty túıtkildi jaıttardy sheshýdi surady.
«Parlamentte «Jaıylymdar týraly» Zań jobasy birinshi oqylymda qaralǵany belgili. Osy oraıda turǵyndar ekinshi oqylym kezinde eskerýge bolatyn birneshe máseleni jetkizdi. Mysaly, qazir keıbir eldi mekender mańynda mal jaıylatyn jer joq. Kezinde sharýa qojalyqtaryna jer aýylǵa jaqyn jerden berilip ketken. Endi olarǵa basqa jer usynylýda. Sol sekildi buryn egistik bolǵan jerlerdi jaıylymǵa aýdarýǵa bolar edi. Mine, osy jerdi qaıta rásimdegen kezde tegin júrgizilse, deıdi olar. Aıtalyq, 50 myń gektarǵa qaıta qujat alý úshin 120 myń teńge qajet. Bul aýyl adamdary úshin az qarjy emes. Eger olar ortaq jaıylym úshin jerdi basqa jaqtan alýǵa kelisip otyrsa, nege jeńildik berilmeske!? Berilgen jerlerdiń ıgerilmeı, bos jatýy, aýyl sharýashylyǵymen aınalysatyn sharýalarǵa memlekettik baǵdarlamalar arqyly nesıe alǵany úshin beriletin demeýqarjynyń toqtatylmaýy qajettigi jáne basqa usynys-tilekter aıtyldy. Munyń bári jumys barysynda eskeriletin bolady», dedi «QazAqparat» tilshisine Erbolat Muqaev.
