BQO-da saılaýshylar ýchaskeleri ashylǵanǵa deıin kezek paıda boldy

ORAL. KAZINFORM — Tańǵy altyda oıanyp, saılaý ýchaskesi aldynda alǵashqylardyń biri bolyp kelgenderdiń qatarynda óńirdiń sharýa qojalyqtarynyń basshylary men qyzmetkerleri boldy.

Solardyń biri — Báıterek aýdanyndaǵy «Beles Agro» JShS ujymy. Búginde «Beles Agro» JShS aýylsharýashylyq salasyn damytýǵa úles qosyp júrgen, un, makaron ónimin shyǵarýmen aınalysýshy birden-bir uıym. Búgin atalǵan sharýashylyq ıesi 130 qyzmetkerimen ózderiniń tańdaýyn jasaýǵa ýchaskeler ashylǵanǵa deıin kelipti.

— Referendým — bul halyqtyń elde bolyp jatqan mańyzdy máselelerge qatysty tikeleı daýys berý arqyly sheshim qabyldaýy. Men Qazaqstannyń azamaty ári patrıoty retinde bul jobany qoldaımyn. Biz óz bolashaǵymyzdy oılap, turaqty ári senimdi energııa kózin tańdaýymyz qajet. Referendýmǵa ertemen keldik, sebebi óndiris kútpeıdi, - deıdi bas tehnolog Nyǵmetjan Aıtqulov.

Aıta ketý kerek, referendým búgin búkil respýblıka boıynsha saǵat 7.00-de bastalyp, keshki 20.00-ge deıin jalǵasady. Sonymen qatar, daýys berý quqyǵy bar árbir azamat saıtta óziniń saılaý ýchaskesin bile alady referendum2024.gov.kz.

Eske sala keteıik, Batys Qazaqstan oblysynda 510 referendým komıssııasy, onyń ishinde 14 aýmaqtyq referendým komıssııasy 496 ýchaskelik komıssııa jumys jasap jatyr.  Konstıtýtsııalyq zań aıasynda qabyldanǵan sheshimderine sáıkes, daýys berý tańǵy saǵat 07.00-de bastaldy. Batys Qazaqstan oblysynda barlyǵy 496 ýchaske jumys jasap jatyr.