BQO-da saılaý ýchaskeleriniń daıyndyǵy tekserildi
ASTANA. KAZINFORM — Quryltaı depýtattaryn saılaý qarsańynda QR Ortalyq saılaý komıssııasynyń hatshysy Shavhat Ótemisov Batys Qazaqstan oblysyna bardy. Sapar barysynda ol saılaý ýchaskelerinde bolyp, memlekettik organdarmen saılaýǵa daıyndyqtyń ózekti máselelerin talqylady.
OSK baspasóz qyzmetiniń málimetinshe, saılaý qorytyndylaryna saılaýshylardyń senimi kóp jaǵdaıda daýys berýdi ýchaskede tikeleı uıymdastyratyn mamandardyń kásibıligine baılanysty. Sondyqtan komıssııalardy daıarlaý jumys barysyndaǵy negizgi baǵyttardyń birine aınaldy. Sapar aıasynda aýmaqtyq jáne ýchaskelik saılaý komıssııalarynyń 120 ókiliniń qatysýymen semınar ótti. Jalpy oblystaǵy 3126 ýchaskelik komıssııa músheleriniń barlyǵy kaskadty oqytýmen qamtyldy.
Sapar barysynda OSK hatshysy Terekti aýdanyndaǵy № 360, № 363, № 367 jáne № 384 ýchaskelik saılaý komıssııalarynyń jumysymen tanysty. Ásirese oqytý barysynda alynǵan bilimniń is júzinde qalaı qoldanylatynyna nazar aýdaryldy.
Budan bólek, Batys Qazaqstan oblystyq aýmaqtyq saılaý komıssııasy saılaý protsesterin tsıfrlandyrý salasyndaǵy pılottyq jobalardy tanystyrdy. Olardyń qatarynda daýys berý kúni ýchaskelik komıssııalardyń jumysyn jeńildetýge, eseptilikti avtomattandyrýǵa, qaǵaz qujat aınalymyn qysqartýǵa jáne negizgi rásimderdi oryndaýǵa ýaqytty únemdeýge baǵyttalǵan tehnologııalyq sheshimder bar.
Shavhat Ótemisov jańa quraldardyń praktıkalyq tıimdiligin, sondaı-aq Quryltaı depýtattaryn saılaýǵa oraı Oralsaylau.kz geoaqparattyq portalynyń jańartylǵan nusqasyn baǵalady.
Óńirde saılaýshylardy aqparattandyrýǵa erekshe nazar aýdarylyp otyr. Dástúrli formattarmen qatar, azamattarmen kommýnıkatsııanyń qosymsha tásilderi engizilip keledi. Bul qajetti aqparatty olardyń kúndelikti bolatyn oryndarynda tikeleı alýǵa múmkindik beredi. Atap aıtqanda, temirjol vokzalynda, halyqaralyq áýejaıda jáne qalanyń eń iri saýda oıyn-saýyq ortalyǵynda jáne oblystyń 5 aýdan ortalyǵynda arnaıy aqparattyq pýnktter ashyldy.
OSK hatshysynyń jumys saparynyń qorytyndy bóligi Quryltaı depýtattaryn saılaýǵa daıyndyq jáne ony ótkizý kezeńinde memlekettik organdardyń ózara is-qımyly máseleleri jónindegi keńes boldy. Basty nazar barlyq qyzmetterdiń is-qımyl úılesimdiligine jáne óńirdiń daýys berý kúnine daıyndyǵyna aýdaryldy.
Batys Qazaqstan oblystyq aýmaqtyq saılaý komıssııasynyń tóraǵasy Ádil Jolamanov saılaý ınfraqurylymyndaǵy ózgerister týraly baıandady. Jyl basynan beri óńirde eki jańa saılaý ýchaskesi qurylyp, saılaýshylar sany az úsh ýchaske taratyldy, taǵy 15 ýchaskeniń shekaralary naqtylandy. Barlyq ózgeris týraly saılaýshylarǵa ýaqtyly aqparat berildi.
Tekserý saparynyń qorytyndysyn shyǵara kele, QR OSK hatshysy Shavhat Ótemisov saılaýǵa daıyndyqtyń sońǵy kezeńinde saılaý protsesine qatysýshylardyń barlyǵynyń is-qımylynyń úılesimdiligi men kásibı jaýapkershiligi aıryqsha mańyzdy ekenin atap ótti.
— Saılaýǵa degen senim eń aldymen jergilikti jerlerde — daýys berý tikeleı uıymdastyrylatyn jerde qalyptasady. Sondyqtan saılaý komıssııalarynyń, memlekettik organdardyń jáne osy protseske tartylǵan barlyq qyzmetterdiń úılesimdi jumysynyń mańyzy zor. Dál osy ózara is-qımyl daýys berýdiń zańdylyǵyn, ashyqtyǵyn jáne naqty uıymdastyrylýyn qamtamasyz etýge múmkindik beredi, — dedi Shavhat Ótemisov.
Batys Qazaqstan oblysynda 502 saılaý komıssııasy jumys isteıdi.
Budan buryn saılaý jaqyndaǵan saıyn tańdaýyn jasamaǵan qazaqstandyqtar sany tórt eseden asa azaıǵanyn jazǵanbyz.
