BQO-da saýda ústemesin asyra belgilegen 9 kásiporyn jaýapqa tartyldy

ORAL. KAZINFORM – Batys Qazaqstan oblysynda tutyný naryǵyn qorǵaý jáne áleýmettik mańyzy bar azyq-túlik taýarlary baǵasynyń negizsiz ósýine soqtyrýy múmkin derekterdiń aldyn alý baǵytynda jumystar júrgizilip jatyr.

BQO boıynsha ekonomıkalyq tergep-tekserý departamentiniń baspasóz qyzmetinen málim etkenindeı, zańnamaǵa sáıkes áleýmettik mańyzy bar azyq-túlik ónimderine belgilenetin shekti saýda ústemesiniń mólsheri óndirýshiniń bosatý baǵasynan nemese kóterme jetkizýshiniń satyp alý baǵasynan 15 paıyzdan aspaýy tıis.

Saýda ústemesin belgilengen mólsherden asyryp jibergeni úshin QR Ákimshilik quqyq buzýshylyq týraly kodeksiniń 204-4-babyna sáıkes ákimshilik jaýapkershilik kózdelgen.

Departament málimeti boıynsha 2025 jyly saýda ústemesin asyra belgilegeni úshin 9 kóterme jabdyqtaýshy kásiporny ákimshilik jaýapkershilikke tartyldy. Máselen, kartopty satý kezinde baǵanyń 725,5 paıyz, pııaz – 381,5, qaraqumyq jarmasy – 225,8, taýyqtyń san eti – 92,6, al taýyq jumyrtqasy 54 paıyzǵa deıin negizsiz qymbattatylǵany anyqtaldy.

Sondaı-aq monıtorıng barysynda áleýmettik mańyzy bar azyq-túlik taýarlaryn memlekettik mekemelerge jetkizý kezinde de saýda ústemesiniń arttyrylǵany belgili boldy. Nátıjesinde memlekettik satyp alý aıasynda jasalǵan 6 kelisimshart buzyldy.

- Jyl basynan beri departament bólimsheleri birinshi qajettiliktegi azyq-túlik ónimderin jetkizý jáne olarǵa baǵa belgileý tetikterine monıtorıngti kúsheıtti. Sonyń nátıjesinde oblystyń 7 mekemesi konkýrs jarııalaǵan kezde-aq áleýmettik mańyzy bar azyq-túlik ónimderin satyp alý barysynda shamamen 9,8 mln teńge únemdeldi. Qazirgi ýaqytta taǵy bir derek qaralýda, - dep habarlady vedomstvodan.

Eske sala keteıik, budan buryn Oralda kúdiktiler bes jyl boıy turǵyndarǵa zańsyz shaǵyn nesıe bergenin jazǵan edik.