BQO-da Sátımola ken ornynda 4 900-dan astam jumys ornyn ashý kózdelip otyr

ORAL. KAZINFORM – Batys Qazaqstan oblysynda eń iri jobalardyń biri – Sátımola ken ornynda kalıı tyńaıtqyshtaryn óndirý kesheniniń qurylysy aıasynda ınfraqurylymdy tartý jumystary bastaldy.

BQO kásipkerlik jáne ındýstrıaldyq-ınnovatsııalyq damý basqarmasy basshysynyń mindetin atqarýshy Bıbigúl Nıetqalıevanyń óńirlik kommýnıkatsııalar qyzmeti alańynda ótken brıfıngte málim etkenindeı, quny 1,5 trln teńgeden asatyn joba aıasynda 4 900-den astam jańa jumys ornyn ashý kózdelip otyr.

Bıbigúl Ábdiǵalıqyzynyń sózine qaraǵanda, 2034 jyly qurylys jumystary tolyq bitedi dep josparlanǵan.

- Sondaı-aq «QPO b.v.» kompanııasy Qarashyǵanaq ken ornyn keńeıtý aıasynda 6-shy kompressordy salý jáne montajdaý jumystaryn júrgizýde. Mundaǵy qurylys 2029 jyly tolyq aıaqtalmaq. Sol sekildi sheteldik ınvestor «ZhaikPetroleumLTD» JShS quny 78,8 mlrd teńge bolatyn suıyq metanol óndirý boıynsha gaz-hımııa keshenin salýda. 58 mlrd teńge kólemindegi qarjylandyrý «Ónerkásipti damytý qory» AQ arqyly qamtamasyz etilgen. Bıyl sonyń 53 mlrd teńgesi ıgerilmek. Qurylys-montaj jumystary aldaǵy shilde aıynda bastalmaq, - dedi B.Nıetqalıeva.

Onyń aıtýynsha, bıyl 56,9 mlrd teńgege 35 jobany (837 jumys orny) júzege asyrý josparlansa, sonyń úsheýi qazirdiń ózinde iske qosyldy. Atap aıtqanda, Oral qalasynda kóterme-taratý ortalyǵy («BatysKapıtalLımıted» JShS), arnaıy tehnıkany boıaý tsehy («Oralagroremmash» JShS) jáne Aqjaıyq aýdanynda sýarmaly ýchaskeler qurý («Amaner IZI» JShS) jobasy máresine jetti.

Eske sala keteıik, budan buryn Batys Qazaqstanda shaǵyn jáne orta kásipkerlikti qoldaýǵa 2,7 mlrd teńge bólinip otyrǵanyn jazǵan edik.