BQO-da sapasyz jaýap berýdiń 200-den astam deregi anyqtalǵan
Onda Altaı Kólginovtiń atap ótkenindeı, azamattardyń aryz-shaǵymyn ýaqtyly qarap, zańda kózdelgen merzimde jaýap berý memlekettik organdar qyzmetkerleriniń basty mindetteriniń biri. Osy rette prokýratýra men sot organdaryna azamattar men zańdy tulǵalar tarapynan memlekettik organdardyń laýazymdy qyzmetkerleriniń zańsyz is-áreketterine qatysty shaǵymdardyń túsýi alańdatpaı qoımaıdy. Degenmen oblys ákimdigi men basqarma-departamentterge túsken aryz-shaǵym, ótinishter sany jyl saıyn azaıyp keledi. Aıtalyq, 2011 jyly 324 myń ótinish qabyldansa, ótken jyly 71 myń bolyp, 4,5 esege kemigen. Bıyl segiz aıda 41 myńnan astam ótinish qaralǵan. Ár memlekettik organǵa túsken kez kelgen ótinishtiń qaraýsyz qalmaýy erekshe mańyzdy.
BQO prokýratýrasynyń basqarma basshysy Jannur Ahmetbektiń sózine qaraǵanda, bıylǵy toǵyz aıda sot organdary memlekettik organdar sheshimine rıza bolmaǵan 79 azamattyń aryzyn maquldaǵan. Sol sekildi prokýratýra organdaryna júginetin azamattardyń kópshiligi turǵyn úı, eńbek daýy, jer telimi, qylmystyq tergeý, kóshi-qon máseleleri, salyqtyq tekserý men medıtsınalyq qyzmet sapasyna qatysty keledi. Jergilikti atqarýshy organdarǵa júrgizilgen tekseris barysynda bıyl aryz ıelerine joldanǵan hat tilinde jaýap bermeýdiń 60, sapasyz jaýap qaıtarýdyń 200-den astam deregi belgili boldy. Sonyń ishinde BQO ákimi apparaty, oblystyq eńbek ınspektsııasy boıynsha basqarma, Oral qalasy sáýlet jáne qala qurylysy bólimi, Syrym aýdany ákimdigi «kózge túsken».
BQO boıynsha mamandandyrylǵan tabıǵat qorǵaý prokýrory Asylan Jańataýovtyń aıtýynsha, óńirde qatty turmystyq qaldyqtardy ornalastyrý kúrdeli bolyp otyr. Bul másele boıynsha tek alty aýyldyq okrýgke ruqsat etilgen. Al 200-deı eldi meken mańynda qoqys tógiletin oryndar zańdastyrylmaǵan. Turmystyq qaldyqtar aýa men qorshaǵan ortanyń lastanyp, topyraqtyń erozııaǵa ushyraýyna áser etedi. Qoqys tógetin oryndarda dezınfektsııalyq kedergiler nemese qaldyqty tasymaldaıtyn avtokólikterdiń kýzovtary men dóńgelekterin jýýǵa arnalǵan qondyrǵylar joq. Qoqys tógý oryndarynyń qyzmetkerleri men basshylyq quramy kásibı daıyndyqtan ótkizilmeıdi.
Jer qoınaýyn paıdalanýshylardyń óndiris jáne burǵylaý qaldyqtaryn qaıta óńdep, ornalastyratyn jerleri bolmaýyna baılanysty da qorshaǵan orta lastanýda. Mysaly, 2012 jyldan beri Zelenov, Bórli aýdandary men Oral qalasy aýmaǵynda óndiristik qaldyqtardy ruqsat etilmegen oryndarda zańsyz ornalastyrýǵa baılanysty 16 qylmystyq is tirkeldi. Osy qylmystyq is-áreket saldarynan qorshaǵan ortaǵa 1,7 mlrd astam teńge shyǵyn keltirildi. Aqsaı qalasynan basqa barlyq aýdan ortalyqtarynda sarqyndy sýlardy qabyldaıtyn nysandar joq. Sonyń saldarynan sarqyndy sýlar belgilenbegen jerlerge tógiledi. Sol sekildi Oral qalasynyń ózinde Derkól aýyly, Zachagan kenti, «Eski áýejaı», «Kýrenı», «Samal-1, 2, 3» shaǵynaýdandary men Jelaev joly boıyndaǵy turǵyn úıler ortalyqtandyrylǵan káriz júıesine qosylmaǵan. Munyń bári qorshaǵan orta men tabıǵatqa eleýli zııan tıgizýi ábden yqtımal.
Otyrysta qaralǵan máseleler boıynsha naqty usynys-pikirler aıtylyp, sheshim qabyldandy.
