BQO-da sapasyz munaı ónimderin jetkizgen kásiporyn dırektory sottaldy
ORAL. QazAqparat – Batys Qazaqstan oblysynda sapasyz munaı ónimderin jetkizgen kásiporyn dırektory sottaldy, dep habarlaıdy QazAqparat tilshisi.
QR Qarjy mınıstrligi Qarjy monıtorıngi komıteti málim etkenindeı, jedel izdestirý sharalary barysynda BQO boıynsha ekonomıkalyq tergeý departamenti qyzmetkerleri zańdy qujatsyz 23 tonna munaı ónimderin tasymaldaǵan avtokólikti ustady.
Zańsyz ónimdi «NaftýnOıl» JShS dızeldi otyn túrinde óńirdegi aýyldardyń birindegi balabaqsha atyna jibergen.
Tekserý barysynda kásiporyn dırektorynyń 2019 jyly Qaztalov aýdanyndaǵy aýyldardyń birindegi bilim berý mekemelerimen 59 mln teńgege 247 tonna dızeldi otyndy jetkizý jóninde birneshe kelisimshart jasasqan. Alaıda dızeldi otynnyń ornyna munaıdy ekinshi ret óńdeýden alynǵan qospa (benzın, kerosın) ónim jetkizilgen.
Qaztalov aýdandyq №2 sotynyń úkimimen kásiporyn dırektory QR QK 197-baby 2-bóligine (birneshe ret munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý) sáıkes aıypty dep tanylyp, sottaldy.
Memleket basshysy Qasym-Jomart Toqaevtyń Tótenshe jaǵdaı jónindegi memlekettik komıssııanyń bıylǵy 10 sáýirdegi kezekti otyrysynda bergen tapsyrmasyna sáıkes QR QM Qarjy monıtorıngi komıteti sapasyz janar-jaǵar maıdy jetkizetin kompanııalar men jeke adamdardy anyqtaý maqsatynda júıeli jumys júrgizýde.
