BQO-da sapasyz taýarǵa tólengen 41,7 mln teńge tutynýshylarǵa qaıtaryldy

Batys Qazaqstan oblysynda sapasyz taýar úshin tólengen 41 mln 737 myń teńge tutynýshylarǵa qaıtaryldy, dep habarlaıdy Kazinform.

BQO saýda jáne tutynýshylar quqyǵyn qorǵaý departamentiniń basshysy Elmıra Qımatovanyń óńirlik kommýnıkatsııalar qyzmeti alańynda ótken brıfıngte málim etkenindeı, mekeme júrgizgen jumystar nátıjesinde zańnamada belgilengen 14 kún merzimde aqshalaı qarajatty qaıtarýǵa járdem kórsetilgen.

Elmıra Nurqyzynyń sózine qaraǵanda, departament zańnamaǵa sáıkes bıznes nysandaryna tutynýshylardyń quqyqtaryn buzý derekteri boıynsha jospardan tys tekserýler júrgizýge quqyly.

Osy oraıda jyl basynan beri iri, orta jáne shaǵyn bıznes nysandaryna jospardan tys 41 tekserý júrgizilgen.

Sonyń qorytyndysy boıynsha 26 kásipkerlik nysany eskertý túrinde ákimshilik jaýapkershilikke tartylsa, beseýine túrli kólemde aıyppul salyndy.

«Departament sondaı-aq Tutynýshy quqyǵyn qorǵaý týraly zańǵa sáıkes talapker bolýǵa jáne onnan astam tutynýshynyń quqyqtary buzylǵan jaǵdaıda sotqa sol másele boıynsha talap aryz jiberýge quqyly. Bul rette BQO mamandandyrylǵan aýdanaralyq ekonomıkalyq sotyna 2 talap aryz joldandy», deıdi E.Qımatova.

Atap aıtqanda, «Álem Fýds» JShS-ne qatysty taýardy tańbalaý bóliginde KO TR 022/2011 «Tamaq ónimderi ony tańbalaý bóliginde» talaptaryna sáıkes kelmeıtin sút ónimin satý faktisi (taýardyń qaptamasynda memlekettik tilde aqparat bolmaǵan) boıynsha talap aryz jiberildi.

Іsti qaraý barysynda daýdy beıbit jolmen retteý týraly kelisimge qol qoıylyp, jaýapker oblys aýmaǵynda atalǵan sút ónimderin ákelmeýge jáne satýǵa mindettendi.

Departament basshysynyń málimdeýinshe, ekinshi talap aryz shaǵyn kásipkerlik nysanyna qatysty joldandy.

Sot isin júrgizýge jeke menshik ıeleri men kóppáterli turǵyn úı turǵyndarynyń ótinishteri negiz boldy.

Eleýli kemshilikterge qaramastan, úı paıdalanýǵa berilgen. Qurylys protsesiniń barlyq qatysýshylary ótken jylǵy 8 aqpanda nysandy qabyldaý aktisine qol qoıǵan.

«Aıaqtalmaǵan jumys kólemine qaramastan, satýshynyń adaldyǵyna úmittenip, ótinish berýshiler satýshymen satyp alý-satý sharttaryn jasasyp, tolyǵymen eseptesken. Bul rette taraptar úı eskızdik jobaǵa sáıkes keltiriletini jáne barlyq kemshilikterdi keıinnen satýshy joıatyny jóninde aýyzsha kelisken. Alaıda, ótinish berýshiler atap ótkendeı, jeke kásipker páter ıeleriniń ótinishterin múldem elemegen. Qazirgi kezde azamattyq is qaralyp jatyr. Departament talapker bolýdan basqa, azamattyq isterdi qaraýǵa úshinshi tulǵa, ıaǵnı memlekettik organnyń mamany retinde de qatysady. Osylaısha, jyl basynan beri azamattardyń tutyný quqyqtaryn qorǵaý baǵytynda mamandar 53 protseske qatysty», dep túıdi oıyn E.Qımatova.

Eske sala keteıik, budan buryn jemqorlyq týraly habarlaǵan BQO-nyń 4 turǵyny 5 mln teńge syıaqy alǵanyn jazǵan edik.