BQO-da sanıtarlyq talaptardy buzǵandarǵa eki kúnde 2,2 mln teńge aıyppul salyndy
ORAL. QazAqparat – Batys Qazaqstan oblysynda sanıtarlyq talaptardy buzǵandarǵa eki kúnde 2,2 mln astam teńge aıyppul salyndy, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, oblysta indetke qarsy kúres sharalary jalǵasýda.
Jergilikti polıtsııa organdary men monıtorıngtik top materıaldary negizinde 10-11 tamyz kúnderi QR Ákimshilik quqyqbuzýshylyq kodeksiniń 425-baby 1-bóligine sáıkes 33 hattama toltyrylyp, qysqartylǵan óndiristi qosa eseptegende, 2,250 mln astam teńge aıyppul salyndy.
Sanıtarlyq-epıdemıologııalyq talaptardy buzǵany úshin 3 jeke kásipker 230 AEK kóleminde aıyppul arqalady. Bulardyń ekeýi ashýǵa ruqsat berilmegen nysan bolsa, bireýi shekteýli ýaqyttan keıin jumys istegen.
Sonymen qatar 30 jeke tulǵa (30 AEK kóleminde) jaýapqa tartyldy. Sonyń ishinde 22 adam túngi 23.00-den keıin óz kóligimen júrgen. Al eki turǵyn kópshiliktiń qatysýymen shara ótkizgen.
