BQO-da sanıtarııalyq buzýshylyqtar boıynsha bilim mekemelerine 360-tan astam uıǵarym berildi

BQO sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń óńirlik kommýnıkatsııalar qyzmeti alańynda ótken brıfıngte málim etkenindeı, tekserýler kenetten, aldyn ala habarlamasyz júrgiziledi.

Gúldana Qaıyrjanqyzynyń sózine qaraǵanda, bul baqylaý bilim berý uıymdaryndaǵy sanıtarııalyq jaǵdaıdy, qaýipsizdikti, tamaqtaný sapasyn, sondaı-aq saýyqtyrý is-sharalaryn uıymdastyrý máselelerin qamtıdy. Erekshe baqylaý men qadaǵalaý nysandarynda josparly jáne jospardan tys tekserýler, tergep-tekserýler, sondaı-aq nysanǵa baryp, monıtorıng júrgizý arqyly júzege asyrylady.

Bıyl 1 maýsym – 1 shilde aralyǵynda óńirdegi bilim berý mekemelerinde monıtorıng júrgizildi.

- Monıtorıngpen josparlanǵan 578 nysannyń 555-i qamtylsa, sonyń 357-si – mektepter, 189-y – jalǵa berilgen as bloktary, 9-y – mektep-ınternat. Anyqtalǵan buzýshylyqtar negizinde ony 10 tamyzǵa deıin joıý týraly 363 uıǵarym berildi. Sonyń ishinde 277-si mektepterge, 81-i as blogyna, beseýi mektep-ınternatqa qatysty. Bilim berý uıymdarynyń basshylaryna jóndeý jumystaryn ýaqtyly aıaqtaý, materıaldyq-tehnıkalyq bazany nyǵaıtý, qolaıly oqý-tárbıe ortasyn qalyptastyrý jáne mektep oqýshylarynyń sapaly ári qaýipsiz tamaqtanýyn uıymdastyrý boıynsha qajetti sharalardy qabyldaý usynyldy. Sonymen qatar bilim berý nysandaryna monıtorıng barysynda sanıtarlyq-epıdemıologııalyq talaptardyń saqtalmaýy boıynsha 63 jedel qoıý sharasy berildi, - dedi G.Kereeva.

Onyń aıtýynsha, búgingi tańda anyqtalǵan kemshilikter negizinde berilgen usynymdar men jedel den qoıý sharalarynyń oryndalýy boıynsha jospardan tys tekserister tirkelip, júrgizilip jatyr.

Eske sala keteıik, budan buryn Batys Qazaqstanda synama alynǵan 94 ónimniń 31-i talapqa saı bolmaı shyqqanyn jazǵan edik.