BQO-da salynyp jatqan munaı óńdeý zaýytynyń qurylysy toqtady
ORAL. QazAqparat – Terekti aýdany Alǵabas aýylynda salynyp jatqan munaı óńdeý zaýytynyń qurylysy toqtady, dep habarlaıdy QazAqparat tilshisi.
Qazirgi kezde jumysshylardyń jalaqysy tólenbeýine baılanysty bas merdiger «Evro Standart LTD» JShS basshysyna qatysty tergeý júrip jatyr.
BQO ákiminiń baspasóz qyzmetinen túsken málimetke qaraǵanda, munaıdy tereń óńdeý jáne joǵary sapaly avtomobıl benzınin, dızeldi otyn, kerosın jáne bıtým óndirý jónindegi zaýyt jobasy óńirdegi kásipkerlikti qoldaý kartasy aıasynda qolǵa alynǵan bolatyn.
Joba tolyqtaı jeke ınvestıtsııa esebinen júzege asyrylýda, ımport almastyrýdy kózdeıdi jáne eksportqa baǵyttalǵan. Munda 200 jańa jumys ornyn ashý josparlanǵan. Alaıda tapsyrys berýshi «AVS-Munaı» JShS men «Evro Standart LTD» JShS arasynda kelispeýshilik týyndaýyna baılanysty qurylys-montaj jáne jobalaý jumystary toqtaǵan. Sonyń saldarynan «Evro Standart LTD» JShS 2019 jyldyń qyrkúıegi úshin 132 qyzmetkerge 12,6 mln teńge qaryzdar bolyp qaldy.
Qarasha aıynda osy qos kompanııa ókilderiniń qatysýymen oblystyq úshjaqty komıssııa otyrysy ótkizilip, Terekti aýdany ákimdigine «Evro Standart LTD» JShS-men birlesip qosalqy merdigerler men jumysshylar sanyn, bereshek kólemin anyqtap, tıisti shara alý tapsyryldy.
Daýly jaǵdaı týyndaǵannan beri BQO boıynsha eńbek ınspektsııasy basqarmasyna 52 qyzmetkerden jalaqy tólemeý deregi boıynsha 10 aryz tústi. Barlyq shaǵym Nur-Sultan qalasy eńbek ınspektsııasy basqarmasyna (zańdy tulǵa elordada tirkelgen) jiberildi.
Tekserý qorytyndysyna sáıkes zańdy tulǵaǵa ákimshilik aıyppul salynyp, zańbuzýshylyqty joıý jóninde uıǵarym berildi. Sonyń nátıjesinde 12,6 mln teńgeniń 8,3 mln teńgesi tólendi. Qazirgi tańda 17 qyzmetkerge 4,3 mln teńge tólenbeı qalyp otyr.
Uıǵarymdy durys oryndamaǵany úshin qaıta tekserý júrgizilip, materıaldar sotqa jiberildi.
«Sonymen qatar Nur-Sultan qalasy eńbek ınspektsııasy basqarmasynyń qyzmetkerleri «Evro Standart LTD» basshysyna qatysty QR QK 152-baby 3-bóligine (basqarý fýnktsııalaryn oryndaıtyn adamnyń aqshany ózge maqsattarǵa paıdalanýyna baılanysty jalaqynyń tolyq kólemde jáne belgilengen merzimde tólenýin birneshe ret kidirtýi) sáıkes qylmystyq is qozǵaý máselesi boıynsha protsessýaldyq sheshim qabyldaý úshin tekserý materıaldaryn elordanyń polıtsııa departamentine jiberdi», - dep habarlady oblys ákiminiń baspasóz qyzmeti.
