BQO-da salynyp jatqan eki qabatty úı órtenip ketti
ORAL. QazAqparat – Batys Qazaqstan oblysynda salynyp jatqan eki qabatty jeke turǵyn úı órtenip ketti, dep habarlaıdy QazAqparat tilshisi.
BQO Tótenshe jaǵdaılar departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń málim etkenindeı, oqıǵa 22 tamyz kúni Terekti aýdany Podstepnyı aýylynda boldy.
Saǵat 08.45-te «Taıtı» kafesiniń aýmaǵynda qurylysy bitpegen eki qabatty úı jandy.
Jalyn sharpyǵan aýmaq 120 sharshy metrdi qamtydy.
«Tilsiz jaý» órt sóndirýshilerdiń kúshimen (6 adam, 3 tehnıka) saǵat 09.48-de aýyzdyqtaldy.
Zardap shekkender joq.
Órttiń shyǵý sebebi, keltirilgen shyǵyn, kináli adamdar anyqtalý ústinde.
«Jylytý maýsymy qarsańynda órttiń kóbeıýi alańdatady. Jyl basynan beri óńirde 383 órt bolyp, saldarynan 10 adam zardap shegip, sonyń úsheýi qaza tapty. Keltirilgen shyǵyn 8 mln teńgeden asty. Sonyń ishinde turǵyn úı sektorynda 225 órt tirkeldi. Sondyqtan barlyq turǵyndarǵa, ásirese, jeke úılerde turatyn azamattarǵa órt qaýipsizdigi erejesin buljytpaı saqtaý kerektigin eske salamyz», dedi QazAqparat tilshisine E.Tóregeldıev.
Eske sala keteıik, budan buryn Batys Qazaqstanda ken ornynda vagondar órtengenin jazǵan bolatynbyz.
