BQO-da salmonellezben aýyrǵandar sany eki eseden astamǵa ósti

ORAL. KAZINFORM — 2025 jyldyń qorytyndysy boıynsha Batys Qazaqstan oblysyndaǵy sanıtarııalyq-epıdemıologııalyq jaǵdaı turaqty dep baǵalandy.

BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń óńirlik kommýnıkatsııalar qyzmeti alańynda ótken brıfıngte málim etkenindeı, ótken jyly óńirde toptyq juqpaly aýrýlar men taǵamnan ýlaný jaǵdaıy tirkelgen joq.

Dınara Oljabaıqyzynyń sózine qaraǵanda, tyrysqaq, oba, qutyrý, sibir jarasy, ish súzegi, dıfterııa, polıomıelıt, sirespe, bezgek jáne botýlızm sııaqty qaýipti juqpaly aýrýlar kezdesken joq. 

Sondaı-aq ótken jyly 18 juqpaly dert, sonyń ishinde qyzylshaǵa shaldyqqandar sany 54,3 ese, kókjótel 2,23, bakterıaldy dızenterııa 2,22, COVID-19 3,21, jedel vırýsty gepatıt 4,35 esege, JRVI 19,1, týberkýlez 14,9, parazıttik aýrýlar (lıamblıoz, opıstorhoz) 30-40 paıyzǵa tómendedi.

— Sonymen birge birqatar ınfektsııalar boıynsha ósý baıqaldy. Atap aıtqanda, jiti ishek ınfektsııalary: salmonellez 2,16, rotavırýs 9,55 esege ósti. Parazıtti aýrýlardyń ishinde enterobıoz 23,1, dermatomıkoz 12,2 paıyzǵa kóbeıdi. Aýa-tamshy jolymen beriletin skarlatına 33,5 paıyzǵa artyp, 1 serozdy menıngıt tirkeldi, — dedi D. Jańabergenova.

Onyń aıtýynsha, munyń negizgi sebepteri — turmystyq baılanys, jeke gıgıenanyń saqtalmaýy, taǵamdy termııalyq óńdeýden jetkiliksiz ótkizý.

Departament málimetine sáıkes oblysta 2025 jyly maqsatty toptaǵy balalar 96,6 paıyz kóleminde profılaktıkalyq ekpemen qamtyldy. Bul Dúnıejúzilik densaýlyq saqtaý uıymy tarapynan usynylǵan 95–100 paıyz deńgeıine tolyq sáıkes keledi.

Eske sala keteıik, budan buryn Batys Qazaqstan oblysynda shoshqa tumaýy da tirkelgenin jazǵan edik.