BQO-da salynyp jatqan úıdiń qabyrǵasy qulap qaldy – ákimdik jaýap berdi

ORAL. KAZINFORM – Batys Qazaqstan oblysy Qaratóbe aýdany Aqqozy aýyldyq okrýgi Qorjyn aýylynda sý tasqynynan zardap shekken turǵyndarǵa arnalyp salynyp jatqan úılerdiń qabyrǵasy jeldiń áserinen qulap qalǵany jóninde áleýmettik jelide beınejazbalar tarady.

Osy beınejazbalarǵa baılanysty Qaratóbe aýdany ákiminiń orynbasary Muhtar Shaıjanov túsinik berdi.

Onyń aıtýynsha, eki úıdiń qabyrǵasynyń syrtqy beti qulaǵan. M.Shaıjanov kemshilik ketkenin jasyrmady. Kirpishti qalaǵan kezde ár alty qatar saıyn tor qaldyryp, ishki jaǵynan keramzıt bloktarmen baılastyryp otyrý kerek edi. Alaıda jumysty tez bitirý maqsatynda qabyrǵanyń syrtqy qasbetin bıikke kóterip jibergen de, ol qulap qalǵan.

«Áleýmettik jelide taralǵan beınejazbalarda qurylys jumystary bitkennen keıin de úıdiń qabyrǵasy qulaıtyny aıtylǵan. Bul qaýip negizsiz. Qazirgi kezde qısaıǵan, qulaǵan qabyrǵa túzetilýde. Qurylys jumystary saraptamadan ótken jobaǵa sáıkes atqarylyp jatyr. Negizgi qabyrǵa keramzıt bloktardan jasalady. Jumys barysyn ýchaske basshysy, tehnıkalyq qadaǵalaýshy, qurylys bóliminiń mamandary baqylaýda ustap otyr. Qurylys barysy qatań baqylaýǵa alyndy», - dedi M.Shaıjanov.

Atalmysh aýylda barlyǵy 90 úı salynyp jatyr.  

Eske sala keteıik, budan buryn BQO-da sý tasqynynan zardap shekken turǵyndarǵa baspana berilip jatqanyn jazǵan bolatynbyz.