BQO-da salynyp jatqan aýrýhana qurylysy nelikten toqyrady
ORAL. KAZINFORM — Batys Qazaqstan oblysy Kaztalov aýdanynda kópbeıindi aýdanaralyq aýrýhana qurylysy mandymaı tur.
Kaztalov aýdanynyń turǵyny Nurlan Qusaıynovtyń Facebook áleýmettik jelisindegi paraqshasynda málim etkenindeı, Prezıdent Qasym-Jomart Toqaevtyń tikeleı tapsyrmasymen qolǵa alynǵan «Aýyldyq densaýlyq saqtaýdy jańǵyrtý» ulttyq jobasy aıasynda 2025 jyldyń qazan aıynda bastalǵan atalmysh nysan búginde «saqaldy» qurylysqa aınalý qaýpinde.
Onyń sózine qaraǵanda, merdiger uıym «MIR-A Construction» JShS qurylys jumystaryn qajetti deńgeıde júrgize almaı otyr. Arnaıy tehnıka jetkiliksiz nemese joq. Sondaı-aq bilikti qurylys mamandary tartylmaǵan. Qurylys qarqyny óte tómen.
— Salystyrmaly túrde alǵanda, Bórli aýdanynda osyndaı kópbeıindi aýdanaralyq aýrýhana qurylysy qarqyndy júrgizilip jatyr. Bul jumysty durys uıymdastyrýǵa bolatynyn kórsetedi. Qazirgi kezeń — qurylys jumystarynyń eń belsendi júrgiziletin ýaqyty. Osyǵan qaramastan, Kaztalov aýdanyndaǵy nysannyń toqyraýy túsiniksiz jáne alańdatarlyq jaǵdaı. Sondyqtan atalǵan qurylys nysany boıynsha naqty tekseris júrgizip, merdiger uıymnyń qyzmetine quqyqtyq baǵa berý, jobanyń ýaqytyly jáne sapaly aıaqtalýyn qamtamasyz etý qajet. Bul qurylys emes, bul — bıýdjet qarajatyn tıimsiz ıgerýdiń aıqyn kórinisi, — deıdi N.Qusaıynov.
Osy máselege oraı Kazinform tilshisi BQO qurylys basqarmasyna arnaıy saýal joldaǵan edi.
Basqarmadan túsken málimetke qaraǵanda, «Aýylda densaýlyq saqtaýdy jańǵyrtý» ulttyq jobasy aıasynda 2025 jyldan oblys aýmaǵynda 2 kópbeıindi ortalyq aýdandyq aýrýhanany (Bórli aýdany Aqsaı qalasy, Kaztalov aýdany Kaztalov aýyly) rekonstrýktsııalaý jumystary júrgizilip jatyr.
Sonyń ishinde Kaztalov aýdandyq aýrýhanasy ǵımaratyn rekonstrýktsııalaý nysany boıynsha memlekettik saraptamanyń oń qorytyndysy 2025 jylǵy 16 shildede alynǵan. Merdiger — «MIR-A Construction» JShS bolsa, avtorlyq qadaǵalaý — «Promenergoproekt» JShS, tehnıkalyq qadaǵalaý — «Injınırıngovaıa kompanııa po organızatsıı stroıtelnogo proızvodstva» JShS.
Jer teliminiń jalpy aýdany — 3,1 ga. Tórt qabatty ǵımarattyń jalpy aýdany — 10 223,24 sharshy metr. Joba boıynsha ǵımarat T-tárizdi, eki tikburyshty bólikten turady. Ǵımaratta MRT, KT jáne angıograf sııaqty medıtsınalyq jabdyqtardy ornalastyrý kózdelgen. Sondaı-aq birinshi qabatta travmatologııalyq pýnkt, dıagnostıkalyq ortalyq, ekinshisinde medıtsınalyq ońaltý jáne travmatologııa bólimi, úshinshisinde nevrologııa, hırýrgııa, teri arqyly koronarlyq aralasý (ChKV) bólimi, tórtinshisinde operatsııalyq blok bolmaq.
— Qazirgi tańda qurylys-montajdaý jumystary óndiristik jumys kestesinen aıtarlyqtaı keshigip otyr, jumystardyń oryndalý deńgeıi — 12 paıyz. Merdiger tarapynan qurylys jumystary ýaqytyly atqarylmaı, kelisimsharttyq mindettemeler tıisti deńgeıde oryndaǵan joq. Bul rette merdiger uıymnyń atyna anyqtalǵan buzýshylyqtardy joıý jáne qurylys jumystaryn jandandyrý týraly talap hattar birneshe ret joldandy. Alaıda kúni búgin merdiger tarapynan tıisti sharalar qabyldanǵan joq. Osyǵan baılanysty «MIR-A Construction» JShS-men kelisimshartty birjaqty buzý boıynsha jumystar júrgizilip jatyr. Kelisimshart buzylǵannan keıin jańa konkýrs jarııalanyp, jańa merdiger anyqtalatyn bolady, — delingen resmı jaýapta.
Sonymen qatar Kaztalov aýdandyq qoǵamdyq keńesiniń múshesi Rýslan Sultanov bir jylǵa jetpeıtin ýaqyt ishinde aýdandyq aýrýhanada birneshe adamnyń ólimi tirkelgenin jetkizdi.
Onyń sózine qaraǵanda, jýyrda 12-13 jastaǵy jasóspirim balanyń mezgilsiz qazasy búkil aýdannyń qabyrǵasyn qaıystyrdy. Sodan keıin taǵy bir 45 jasar er adam ajal qushty. Budan biz qaı ǵasyrda ómir súrip jatyrmyz? degen saýal týyndaıdy.
— Nege Kaztalov aýdanynyń halqy qarapaıym medıtsınalyq kómek ala almaı, aýrýhana tabaldyryǵynda jan tapsyrýy tıis? Onda, tipti, otteginiń ózine deıin jetispeıdi. Qural-jabdyqtarǵa qosa keıbir mamandardyń áreketi kúmán týdyrady. Aýrýhanadaǵy ólim-jitim qalypty jaǵdaıǵa aınalǵandaı. Bas dáriger bul masqara úshin qashan jaýap beredi? Menińshe, bas dárigerdi aýystyryp, ornyna bilikti maman taǵaıyndaý kerek. Sonda aýrýhana jumysy qalypqa keler edi dep oılaımyn. Oǵan qosa biz shyryldap jatqan kezde jergilikti aýdan ákimdigi men máslıhattyń, qoǵamdyq uıymdardyń únsiz otyrǵany qaıran qaldyrady, — deıdi R.Sultanov.
Bul máselege oraı jaýap bergen BQO densaýlyq saqtaý basqarmasynyń málimetine qaraǵanda, medıtsınalyq uıymdarda tirkelgen barlyq ólim deregi QR Densaýlyq saqtaý mınıstriniń 2020 jylǵy 3 jeltoqsandaǵy № QR DSM-230/2020 buıryǵyna sáıkes mindetti túrde saraptamaǵa jatady.
— Qoldanystaǵy qaǵıdalarǵa sáıkes árbir jaǵdaı boıynsha ishki jáne syrtqy saraptamalar júrgizilip, tıisti tekserý is-sharalary uıymdastyrylady. Saraptama qorytyndylary negizinde anyqtalǵan kemshilikter boıynsha qajetti sharalar qabyldanyp, qajet bolǵan jaǵdaıda materıaldar ýákiletti organdarǵa joldanady. Bul jaǵdaı boıynsha jedel túrde oblystyq beıindi mamandardyń qatysýymen komıssııa quryldy. Qazirgi ýaqytta másele baqylaýǵa alynyp, jan-jaqty tekserý jumystary júrgizilýde. Tekserý nátıjeleri boıynsha tıisti sheshimder qabyldanatyn bolady, — dep habarlady BQO densaýlyq saqtaý basqarmasy.
Eske sala keteıik, budan buryn BQO-da apatty mektepterdiń ornyna jańasy qashan salynatynyn jazǵan bolatynbyz.
