00:46, 10 Mamyr 2023 | GMT +6

BQO-da Sadyq Jaqsyǵulovty eske alýǵa arnalǵan dástúrli týrnır máresine jetti

ORAL. QazAqparat – Tasqala aýdany ortalyǵynda qazaq kúresinen Keńes Odaǵynyń batyry Sadyq Jaqsyǵulovty (1924-2009) eske alýǵa arnalǵan 2003-2006 jylǵy jastar arasynda oblystyq ashyq týrnır aıaqtaldy, dep habarlaıdy QazAqparat tilshisi.

Batyrdyń qurmetine ári Tasqala aýdanynyń 90 jyldyǵy aıasynda uıymdastyrylǵan dástúrli dodada oblys aýdandary men mekeme, uıymdardan 14 komanda quramynda balýandar baq synap, alty salmaq dárejesi boıynsha myqtylar anyqtaldy.

Jarys qorytyndysynda 48 kelige deıingi salmaqta tasqalalyq Ámir Saparǵalı úzdik shyqty. 53 kelige deıingi salmaqta taǵy bir tasqalalyq Aqtilek Aqbolatovtyń baǵy jandy. Jańaqalalyq Jalǵas Tilekqabyl 60 kelige deıingi salmaqta chempıon atandy. Oraldyq Bekjan Ǵalymjan (67 kg), terektilik Danıl Kırılov (90 kg) jeńimpazdar qatarynan kórindi. Al, 90 keliden joǵary salmaqta tasqalalyq Elnar Janbolatuly qarsylas shaq keltirmedi.

E. Janbolatuly «Túıe balýan» básekesinde de barlyq qarsylasyn joldan taıdyryp, bas júldeni (300 myń teńge) jeńip aldy.

Tasqala aýdany Mereı aýylynan kelgen Oralbek Ýálıhanov «Jeńiske degen jigeri úshin» atalymymen marapattaldy.

Týrnır sońynda barlyq jeńimpaz-júldegerlerge medaldar, dıplomdar jáne demeýshilerdiń esebinen qarjylaı syılyqtar tabys etildi.

Bul jarys marqum Sadyq Shákeluly Jaqsyǵulovtyń kózi tiri kezinde, 1976 jyldan bastap uıymdastyrylyp, respýblıkalyq deńgeıde de ótip júrdi.

Sadyq Jaqsyǵulov 1924 jyly 7 qarashada Jańaqala aýdanynda dúnıege kelgen. 1941 jylǵa deıin maı zaýytynda jumys istegen. 18 jasynda maıdanǵa suranyp, Kýrsk ıinindegi surapyl shaıqasqa qatysqan. Dnepr ózeninen alǵashqylar sapynda ótip, jaý tehnıkasy men adam kúshterin shyǵynǵa ushyratyp, qarýlastarynyń ózennen ótýin qamtamasyz etkeni úshin mınomet raschetynyń serjanty Sadyq Jaqsyǵulovqa Batyr ataǵy berildi. Eýropanyń biraz jerin fashızmnen azat etýge atsalysqan Batyr Jeńis kúnin Aýstrııa jerinde qarsy aldy.

Elge oralǵannan keıin kóp jyl Tasqala aýdanynda partııa, keńes organdarynda basshylyq qyzmetter atqardy. Ómiriniń sońǵy jyldarynda aýdandyq ardagerler keńesiniń tóraǵasy boldy. Tasqala aýdanynyń qurmetti azamaty ataǵyn alǵan S. Jaqsyǵulov 2009 jyly 85 jasqa aıaq basqan shaǵynda ómirden ozdy.