BQO-da ruqsat etilmegen 110-nan astam qoqys úıindisi tirkeldi
ORAL. KAZINFORM — Batys Qazaqstan oblysy aýmaǵynda kosmostyq monıtorıng derekterine sáıkes ruqsat etilmegen 113 qoqys úıindisi anyqtaldy.
BQO boıynsha ekologııa departamentiniń basshysy Murat Ermekqalıevtiń brıfıngte málim etkenindeı, sonyń 64-i Báıterek, 20-sy Terekti, 10-y Bórli, ekeýi Syrym aýdany, 17-si Oral qalasy aýmaǵynda tirkeldi.
Murat Shymanǵalıulynyń sózine qaraǵanda, kúni búginge deıin sonyń 84-i nemese 74 paıyzy joıyldy.
- Ekologııa departamenti ruqsat etilmegen qoqys úıindilerine turaqty negizde monıtorıng júrgizedi, olardy anyqtaıdy. Sondaı-aq ýákiletti memlekettik organdar ókilderiniń qatysýymen birlesken reıdtik is-sharalar ótkizedi. Bıylǵy sáýir-shilde aılarynda Oral qalasynda, sondaı-aq Báıterek jáne Terekti aýdandarynda ótkizilgen 14 reıd barysynda ruqsat etilmegen 31 qoqys úıindisi belgili boldy. Keıin olardy jergilikti atqarýshy organdar tolyǵymen joıdy, - deıdi M.Ermekqalıev.
Departamenttiń derekteri boıynsha bıylǵy birinshi jartyjyldyqta 56,8 myń tonna qaldyq kómildi, bul ótken jylǵy osy kezeńmen (44,6 myń tonna) salystyrǵanda, 12,2 myń tonnaǵa nemese 27,4 paıyzǵa artyq.
Sonyń ishinde 29,9 myń tonnasy nemese 53 paıyzy Oral qalasyndaǵy qatty turmystyq qaldyqtar polıgony, 5,5 myń tonnasy (9,7 paıyzy) Aqsaıdaǵy osyndaı polıgonnyń úlesine tıedi. Sondaı-aq 11,1 myń tonnasy (19,5 paıyzy) «QPO b.v.» polıgonynda, 0,228 myń tonnasy (0,4 paıyzy) «Jaıyq taza qala» JShS alańynda, 10,0 myń tonnasy (17,6 paıyzy) aýdandarda kenttik qoqys oryndarynda kómildi.
Eske sala keteıik, budan buryn Batys Qazaqstanda ekologııa salasynda 115 zań buzýshylyq anyqtalǵanyn jazǵan edik.
